کراچی (شوبز ڈیسک): چئیرمین پی ٹی آئی اور سابق وزیراعظم عمران کی سابق اہلیہ جمائمہ خان کی فلم آج پاکستان میں ریلیز ہونے جارہی ہے۔اس موقع پر انہوں نے ایک پاکستانی نجی ٹی وی چینل کو خصوصی انٹرویو دیتے ہوئے کہاکہ فلم پاکستان میں میرے دس سالہ تجربے پر مبنی ہے، جسے بنانے کا مقصد پاکستان کو دنیا بھر میں دیکھانا تھا۔
انہوں نے کہاکہ بدقسمتی سے پاکستان سے متعلق بری خبریں بڑے پردے پر دیکھائی جاتی ہیں،پاکستانی فینز اور میرے بچے پاکستان سے متعلق ایسی باتوں سے پریشان تھے، اسی لیے پاکستان خاص طور پر لاہور کے خوبصورت ثقافتی رنگوں کو دنیا بھر میں دیکھانے کی کوشش کی۔
جمائمہ خان نے کہاکہ امید کرتی ہوں پاکستانی میری اس کوشش کو پسند کریں گے، تمام پاکستانیوں کی جانب سے ملنے والی محبت کی مشکور ہوں، امید کرتی ہوں فلم بنانے کے پیچھے میری نیت کو سمجھے ہونگے
انہوں نے کہاکہ قاسم اور سلیمان نے فلم دیکھنے کے بعد بہت پسند کی، انہیں فخر ہے۔
جمائمہ خان نے بتایاکہ میں پاکستان میں سیلاب زدگان کی مدد کے لیے فنڈز جمع کرتی رہی ہوں، اس کے علاؤہ شام اور ترکیہ میں زلزلہ زدگان کی مدد کے لیے بھی کوشش جاری ہے، پوری کوشش کی ہے کہ سیلاب زدگان کی مدد اور دنیا میں رونما ہونے والی ماحولیاتی تبدیلیوں پر آگہی پھیلاؤ۔
انہوں نے کہاکہ پاکستانی فنکاروں کے ساتھ کام کرنے کا تجربہ بہت اچھا تھا، سجل علی بہت پسند ہیں وہ ایک بہترین اداکارہ ہیں، میرے خیال میں سجل علی اصل سپر اسٹار ہیں۔
جمائمہ نے کہاکہ زندگی کا اہم حصہ پاکستان میں گزارا، جب پاکستان میں رہی تو لوگوں کی جانب سے بے حد پیار ملا، اتنا پیار تو مجھے یہاں نہیں ملا،پاکستان سے پیار اب میرا حصہ بن چکا ہے۔
انہوں نے مزید کہاکہ اپنی فلم کے حوالے سے ڈر تو لگ رہا ہے مگر امید کرتی ہوں پاکستان میں لوگ میری فلم کو پسند کریں گے۔
