لاہور (ویب ڈیسک): سابق وزیراعظم عمران خان نے پولیس کی جانب سے اپنے گھر کے محاصرے کے حوالے سے ٹوئٹ کیا ہے۔اپنی ٹوئٹ میں عمران خان نے تقریر کا لنک شیئر کرتے ہوئے لکھا کہ میری اگلی گرفتاری سے قبل شاید یہ میری آخری ٹوئٹ ہو کیونکہ پولیس میری رہائشگاہ کا محاصرہ کر چکی ہے۔دوسری جانب لاہور میں پولیس نے سابق وزیراعظم عمران خان کی رہائش گاہ زمان پارک جانے والے تمام راستے بند کردیے ہیں۔پولیس ذرائع کے مطابق پی ٹی آئی کارکنوں کو زمان پارک جانے سے روکنے کیلئے راستے بند کیے گئے ہیں۔
میں نے سنا ہے 40 دہشتگرد میرے گھر میں ہیں، عمران خان pic.twitter.com/CJMDv2L4QG
— Geo News Urdu (@geonews_urdu) May 17, 2023
پولیس ذرائع کا کہنا ہے کہ زمان پارک کے اطراف میں کسی بھی وقت آپریشن کیاجاسکتا ہے۔
خیال رہے کہ پنجاب حکومت نے زمان پارک میں موجودشرپسندوں کو سرنڈر کرنے کی ڈیڈلائن دی ہے۔
علاوہ ازیں کارکنوں سے ویڈیو خطاب میں عمران خان نے کہا کہ ڈر یہ ہے کہ جو ہورہا ہے اس کا بہت بڑا بیک لیش آنے والا ہے جو مزید نقصان پہنچائے گا، ہم عدالت جارہے ہیں کہ جوڈیشل کمیشن بنایا جائے، ہمارے پاس ثبوت آگئے ہیں، ثبوت آگئے ہر جگہ وہ لوگ نظر آئے جو ہماری پارٹی کے نہیں تھے، ان لوگوں کے پاس اسلحہ بھی تھا لوگوں کو کہہ رہے تھے کورکمانڈر ہاؤس پر حملہ کرو۔
عمران خان نے کہا ہ میانوالی کا جہاز چوک کس نے جلایا؟ میرے کارکن کہہ رہے ہیں کہ جب ان کو پتا چلا تو روکنے کی کوشش کی، کوئی نامعلوم افراد تھے اس میں، اس کی تحقیقات ہونی چاہیے، ریڈیو پاکستان کیسے جل گیا؟ مظاہرہ تو کہیں اور تھا،ادھر تو بندہ ہی کوئی نہیں تھا۔
چیئرمین تحریک انصاف نے کہا کہ آج کل تو نادرا سے چہرے کی شناخت ہوسکتی ہے، اب تک ہمارے 25 افراد شہید ہوچکے ہیں، کس طرح پرامن احتجاج کرنے والوں کو سیدھی گولیاں ماری گئیں، 700 افراد اسپتال میں ہیں جو گولی لگنے سے زخمی ہیں، اب تک ساڑھے 7 ہزار کارکنوں کو جیل میں ڈالا گیا ، گرفتار کارکنوں میں خواتین بھی شامل ہیں، خوف ہے کہ ان سے برا برتاؤ کیا جائےگا۔
عمران خان نے کہا کہ ابھی سنا ہے کہ میں نے گھر میں 40 دہشتگردوں کو پناہ دی ہے، کہا گیا کہ میرے گھر پر کارروائی ہوگی، میری گزارش ہے کہ 40 دہشتگرد ہیں تو میری زندگی بھی خطرے میں ہے، مہربانی کرکے میرے گھر ضرور آئیں لیکن دھاوا بول کر نہ آئیں، مہذب معاشرے کی طرح سرچ وارنٹ لے کر آئیں، نام تو دیں کہ دہشتگرد کون ہے ہم سارا گھر دکھادیں گے، اس کو بہانہ نہ بنائیں کہ 40 دہشتگرد چھپے ہیں تو گھر پر حملہ کردو، اس آگ کو اور آگے نہ بڑھائیں۔
سابق وزیراعظم نے کہا کہ اس وقت 70 فیصد قوم اس طرف کھڑی ہے، ان تھوڑے سے ریلو کٹوں کو بچانے کیلئے بڑی جماعت کو ختم کریں گے؟ عقل کریں بات کریں مسئلہ حل کریں، مسئلہ ایک ہی ہے، کسی سے بھی پوچھ لیں استحکام نہیں آسکتا جب تک الیکشن نہ کرائیں، اپیل ہے کہ ملک کو بچائیں اور الیکشن کرائیں۔
