بدین (ویب ڈیسک): چیئرمین پیپلز پارٹی بلاول بھٹو زرداری کا کہنا ہے شیر عوام کا خون چوستا ہے، اسے چوتھی بار وزیراعظم نہیں بننے دیں گے اور اس کا راستہ روکیں گے۔بدین میں عوامی جلسے سے خطاب کرتے ہوئے بلاول بھٹو زرداری کا کہنا تھا پیپلز پارٹی ملک بھر میں جدوجہد کر رہی ہے کہ 8 فروری کو عوام کی حکومت بنے، چاہتے ہیں کہ ملک میں عوامی راج قائم ہو۔ان کا کہنا تھا پیپلز پارٹی واحد جماعت ہے جو الیکشن لڑ رہی ہے اور مہم چلا رہی ہے، ایک صاحب چوتھی بار وزیراعظم بننا چاہ رہے ہیں لیکن ان کے پاس کوئی منشور نہیں ہے، ہم عوام کی طاقت پر اور وہ سازشوں پر یقین رکھتے ہیں، جو نفرت اور تقسیم کی سیاست کر رہے ہیں وہ پاکستان کو نقصان پہنچا رہے ہیں، انھیں غریب عوام کی کوئی فکر نہیں، صرف چوتھی بار وزیراعظم بننے کی فکرہے۔
چیئرمین پیپلز پارٹی کا کہنا تھا جب بھی یہ شخص آپ پر مسلط کیا گیا نقصان پاکستان کے عوام کا ہوا، یہ وہ شیر ہے جو عوام کا خون چوستا ہے، الیکشن میں صرف ن لیگ اور پیپلزپارٹی ایک دوسرے کا مقابلہ کر رہی ہیں، ہم اسے چوتھی بار وزیراعظم بننے نہیں دیں گے اور اس کا راستہ روکیں گے۔
انہوں نے مزید کہا کہ پیپلز پارٹی کا 10 نکاتی ایجنڈا معاشی مسائل کا حل ہے، حکومت ملی تو غریب عوام کو 300 یونٹ تک مفت بجلی دوں گا، 20 لاکھ پکے گھر سیلاب متاثرین کے لیے بنا رہے ہیں، بے نظیر انکم سپورٹ میں اضافہ اور غریبوں کو بلا سود قرضے دلوائیں گے، حکومت میں آئے تو کسانوں کو ہاری کارڈ دیں گے، ہاری کارڈ سے کسان کی فصل کی انشورنس ہوگی۔
