کراچی (ویب ڈیسک): سندھ ہائیکورٹ کے جج نے لوڈشیڈنگ کے خلاف درخواست پر مزید سماعت سے معذرت کرلی۔سندھ ہائیکورٹ میں اپوزیشن لیڈر سٹی کونسل سمیت 9 ٹاؤن چیئر مینز کی بجلی کی لوڈ شیڈنگ کے خلاف درخواست پر بینچ کے سربراہ جسٹس محمد اقبال کلہوڑو نے مزید سماعت سے معذرت کرلی۔ عدالت نے کیس مزید سماعت کے لیے چیف جسٹس سندھ ہائیکورٹ کو ارسال کردیا۔دوسری جانب نیپرا نے درخواست پر اپنے اعتراضات اور جواب جمع کرادیے جس میں کہا گیا ہےکہ درخواست گزاروں نے متبادل فورم کی موجودگی میں عدالت سے رجوع کیا۔
نیپرا نے استدعا کی کہ درخواست ناقابل سماعت ہے مسترد کی جائے، ٹاؤن چیئرمین لیاقت آباد نے نیپرا کو لوڈ شیڈنگ سے متعلق شکایت درج کرائی، ٹاؤن چیئرمین لیاقت آباد شکایت کی متعدد سماعتوں میں سے صرف ایک میں خود پیش ہوئے، نیپرا نے کے الیکٹرک کو علاقے میں ترسیل کے نظام کو اپگریڈ کرنے کی ہدایت کی۔
نیپرا نے کہا کہ کمرشل بنیادوں پر لوڈ شیڈنگ نیپرا قوانین کی خلاف ورزی ہے، 2023 میں کے الیکٹرک کو شوکاز نوٹس جاری کیا تھا، 2024 میں لائن لاسز کی بنیاد پر لوڈشیڈنگ کرنے پر کے الیکٹرک پر5کروڑ روپے جرمانہ کیا،کے الیکٹرک نے جرمانے کے خلاف حکم امتناع حاصل کررکھا ہے، نیپرا بطور ریگولیٹر کسی بھی خلاف ورزی پر کارروائی کرتا ہے۔
نیپرا کے جواب میں مزیدکہا گیا ہےکہ عدالتی احکامات کے مطابق کے الیکٹرک کو سروے کے احکامات جاری کردیے، نیپرا کی جانب سے کے الیکٹرک کو مانیٹر کیا جارہا ہے، کسی بھی خلاف ورزی کی صورت میں قانونی کارروائی کی جائے گی۔
بعد ازاں کیس کی مزید سماعت 12 ستمبر تک ملتوی کردی گئی۔
