دبئی (ہیلتھ ڈیسک): متحدہ عرب امارات کے اسپتال غزہ کی پٹی پر متاثرہ ایک ہزار فلسطینی بچوں کو طبی امداد فراہم کریں گے۔اسرائیلی بربریت کا شکار فلسطینیوں میں ایک بڑی تعداد معصوم بچوں کی بھی ہے جس میں ہزاروں بچے زخمی ہیں اور ہزاروں ہی جان سے جاچکے ہیں۔اماراتی نیوز ایجنسی کے مطابق غزہ کی پٹی پر اسرائیلی جارحیت سے متاثرہ ایک ہزار بچوں کو اماراتی اسپتال طبی امداد فراہم کریں گے۔
رپورٹس کے مطابق متحدہ عرب امارات کے صدر شیخ محمد بن زاید کی ہدایت پر وزیر خارجہ اور انٹرنیشنل کمیٹی آف ریڈ کراس (آئی سی آر سی) کی صدر کے درمیان ٹیلی فونک رابطہ ہوا جس میں یہ فیصلہ کیا گیا۔
اماراتی نیوز ایجنسی کےمطابق غزہ کی پٹی پر اسرائیلی بربریت سے متاثرہ بچے اپنے اہل خانہ کے ساتھ متحدہ عرب امارات جائیں گے جہاں انہیں علاج و معالجے کی سہولیات فراہم کرکے وطن واپس بھیجا جائے گا۔
واضح رہے کہ اب تک اسرائیلی جارحیت سے شہید ہونے والوں کی مجموعی تعداد 8900 سے زیادہ ہوگئی ہے۔
اقوام متحدہ کےادارہ برائے اطفال یونیسیف کا کہنا ہےکہ غزہ میں ہر روز 420 سے زائد بچے اسرائیلی بمباری سے شہید یا زخمی ہو رہے ہیں اور غزہ میں ہر 10 منٹ میں ایک بچہ شہید ہو رہا ہے۔
