کراچی (اسپورٹس ڈیسک): پاکستان سپر لیگ کے آٹھویں ایڈیشن کے میچ میں کراچی کنگز نے اسلام آباد یونائیٹڈ کو فتح کے لیے 174 رنز کا ہدف دیا ہے۔کراچی کے نیشنل بینک اسٹیڈیم میں کھیلے جا رہے ایونٹ کے چوتھے میچ میں اسلام آباد یونائیٹڈ کے کپتان شاداب خان نے ٹاس جیت کر کراچی کنگز کو بیٹنگ کی دعوت دی۔
کراچی کنگز کی اننگز کا آغاز اس مرتبہ بھی کچھ اچھا ثابت نہ ہوسکا اور جیمز ونس صرف چار رنز بنانے کے بعد رومان رئیس کو وکٹ دے بیٹھے۔
اس کے بعد شرجیل خان کا ساتھ دینے حیدر علی آئے اور دونوں کھلاڑیوں نے عمدہ بیٹنگ کرتے ہوئے دوسری وکٹ کے لیے 77رنز کی شراکت قائم کی۔اس شراکت کا خاتمہ کرنے کے لیے کپتان شاداب خان انگلینڈ سے آئے فاسٹ باؤلر تام کرن کو لے کر آئے جنہوں نے کپتان کے اعتماد پر پورا اترتے ہوئے شرجیل کی 34رنز کی اننگز کا خاتمہ کردیا۔
دوسرے اینڈ سے حیدر علی ڈٹے رہے اور شاداب خان کو چھکا اور چوکا لگا کر اپنی نصف سنچری مکمل کی، وہ 2 چھکوں اور 7 چوکوں سے مزین 59 رنز کی اننگز کھیلنے کے بعد پویلین لوٹے۔
میتھیو ویڈ 18 گیندوں پر 18 رنز بنائے لیکن اس سے قبل کہ وہ خطرناک ثابت ہوتے، محمد وسیم جونیئر نے انہیں چلتا کردیا اور پھر اگلی ہی گیند پر گزشتہ میچ کے ہیرو کراچی کنگز کے کپتان عماد وسیم کو بھی بغیر کوئی رن بنائے پویلین واپسی پر مجبور کردیا۔
عرفان خان نے کچھ ہاتھ دکھاتے ہوئے دو چھکوں کی مدد سے 19 رنز بنائے جبکہ شعیب ملک نے بھی 18 رنز کی برق رفتار اننگز کھیلی۔کراچی کنگز نے مقررہ اوورز میں 7 وکٹوں کے نقصان پر 173رنز بنائے۔
اسلام آباد یونائیٹڈ کی جانب سے رومان رئیس، وسیم جونیئر اور ٹام کرن نے دو، دو وکٹیں حاصل کیں۔اس سے قبل اسلام آباد یونائیٹڈ نے ٹاس جیتا تو شاداب خان نے کہا کہ ہمیں نہیں معلوم کہ پچ کا رویہ کیسا ہو گا لہٰذا ہم چاہتے ہیں کہ ہمیں معلوم ہو کہ ہم کس ہدف کا تعاقب کررہے ہیں۔
میچ کے لیے کراچی کنگز کی ٹیم میں چار تبدیلیاں کی گئی ہیں اور قاسم اکرم، بین کٹنگ، میر حمزہ اور عمران طاہر کی جگہ جیمز ونس، جیمز فُلر، عرفان نیازی اور موسیٰ خان کو کھلایا گیا ہے۔
کراچی کنگز کو لیگ میں کھیلے گئے اپنے پہلے میچ میں شکست کا سامنا کرنا پڑا تھا جبکہ اسلام آباد یونائیٹڈ کی ٹیم اپنا پہلا میچ کھیل رہی ہے۔
