حیدرآباد (ویب ڈیسک): عوامی تحریک کے مرکزی صدر ایڈووکیٹ وسند تھری، مرکزی سینئر نائب صدر نور احمد کاتیار، عوامی تحریک کے مرکزی ڈپٹی جنرل سیکریٹری ایڈووکیٹ راحیل بھٹو، مرکزی میڈیا سیکریٹری کاشف ملاح، سندھیانی تحریک کی رہنما حسنا راہوجو نے حیدرآباد پریس کلب میں پریس کانفرنس کرتے ہوئے کہا کہ اسٹیبلشمنٹ نے موجودہ حکومت کو جعلی انتخابات کے ذریعے منتخب کرا کے اس لیے اقتدار میں لایا ہے تاکہ اس سے ملک میں شامل اکائیوں اور قوموں کے وسائل کو لوٹنے کے تمام قوانین بنوائے جائیں اور فیصلے کروائے جائیں۔انہوں نے کہا کہ 26ویں آئینی ترمیم کے بعد انسدادِ دہشت گردی کا ایکٹ لایا گیا، جس کے ذریعے بنیادی انسانی حقوق کو پاؤں تلے روند دیا گیا۔ بظاہر سوشل میڈیا کو کنٹرول کرنے کے لیے پیکا ایکٹ لایا گیا، مگر پیکا ایکٹ نہ صرف صحافیوں بلکہ ملک کے تمام عوام کی آواز دبانے کا کالا قانون ہے۔ موجودہ حکومت سے پہلے بھی پی ڈی ایم کی مشترکہ حکومت تھی اور اس وقت بھی موجودہ وزیرِاعظم میاں شہباز شریف تھے، اس وقت بھی تیزی سے ملک دشمن کالے قوانین پاس کیے گئے تھے۔اب 27ویں آئینی ترمیم کا شدت سے ذکر ہو رہا ہے اور معلوم ہوا ہے کہ آئندہ 26 ستمبر کو قومی اسمبلی میں 27ویں آئینی ترمیم کا بل پیش کیا جا رہا ہے، جس میں صوبوں سے اپنی حدود میں ردوبدل کے اختیارات چھین کر نئے صوبے بنانے کے مکمل اختیارات وفاق کے حوالے کیے جائیں گے۔ ہم سمجھتے ہیں کہ اگر 27ویں آئینی ترمیم کے ذریعے اس طرح کا کالا قانون لایا گیا تو یہ ملک کے لیے انتہائی خطرناک ثابت ہوگا۔
ملک کے حکمران اسٹیبلشمنٹ کے اشاروں پر ایسے ملک دشمن قوانین بناتے ہیں جن سے ملک کی سالمیت خطرے میں پڑ جاتی ہے۔ 1971 میں بھی جب اسٹیبلشمنٹ نے بنگالیوں کو دیوار سے لگایا تو اس کے خطرناک نتائج نکلے اور پاکستان دو حصوں میں تقسیم ہوگیا۔ آج بھی اسٹیبلشمنٹ ملک دشمن سازشوں میں ملوث ہے کیونکہ بنگلہ دیش کے ساتھ کیے گئے مظالم، زیادتیوں، جبر اور ظلم کے نتیجے میں ملک کے ٹوٹنے کے باوجود اسٹیبلشمنٹ یا اس کے پالے ہوئے ملک توڑنے والوں میں سے کسی ایک شخص کو بھی سزا نہیں ملی۔ آج بھی اسٹیبلشمنٹ صوبائی اکائیوں کے خلاف سازشوں اور سنگین جرائم میں ملوث ہے۔
جعلی اور ڈیجیٹل مردم شماری کے ذریعے سندھ کے عوام کی تعداد کم کر کے دکھائی گئی۔ این ایف سی ایوارڈ میں سندھ کے ساتھ انصاف نہیں کیا جا رہا۔ سندھ کے پانی پر مسلسل پنجاب کے حکمرانوں کے ڈاکے جاری ہیں۔ وفاقی اداروں میں سندھ کے لوگوں کو نوکریاں نہیں دی جاتیں۔ سندھ کے تیل، کوئلے، گیس، پٹرول سمیت معدنی وسائل پر وفاق قابض ہے۔ گزشتہ انتخابات میں ایک بار پھر ایم کیو ایم کے دہشت گردوں کو زندہ کیا گیا۔ دہشت گردوں کو انتخابات میں جتوایا گیا اور سندھ کے عوام کے سینے پر مسلط کیا گیا۔
ایم کیو ایم کا گورنر کامران ٹیسوری، مصطفیٰ کمال، فاروق ستار، ان کے ساتھ خیبر پختونخوا کا وزیرِاعلیٰ علی امین گنڈا پور اور دیگر نئے صوبوں کے حق میں مہم چلا رہے ہیں۔ وفاق کی معاشی تھنک ٹینک کمیٹی، جس کا کام معیشت کو بہتر کرنے کے لیے تجاویز دینا ہے، اس نے ملک میں 12 سے زائد نئے صوبے بنانے کی تجویز دی ہے۔
ہم سمجھتے ہیں کہ سندھ کو تقسیم کرنے کی سازش ملک اور سندھ دشمنی ہے۔ وفاق پہلے بھی ون یونٹ کی شکل میں صوبوں اور قوموں سے دشمنی کر چکا ہے اور ان کی شناخت، تاریخ اور تہذیب ختم کرنے کی سازش کی تھی، جسے طویل جدوجہد کے بعد ناکام بنایا گیا۔
سندھ کا وجود ہزاروں سال پرانا ہے، پاکستان کا خالق سندھ ہے۔ 1940 کے قراردادِ لاہور کے ذریعے سندھ نے پاکستان کو وجود دیا، پاکستان نے سندھ کو نہیں بنایا بلکہ سندھ نے پاکستان کو بنایا۔ اگر حکمران 27ویں آئینی ترمیم کے ذریعے نئے صوبے بنانے کا اختیار وفاق کو دیتے ہیں تو یہ عمل صوبائی اکائیوں کی تاریخ، تہذیب اور وجود کے خلاف ہوگا۔ سندھ کی سالمیت اور وجود کے ساتھ کھیلنے والے عمل کو کوئی بھی محب وطن شخص برداشت نہیں کرے گا۔ ایک طرف 27ویں آئینی ترمیم کے ذریعے نئے صوبے بنانے کے لیے کالے قوانین لائے جا رہے ہیں اور دوسری طرف پنجاب میں سیلاب کا بہانہ بنا کر کالا باغ ڈیم سمیت نئے ڈیموں اور نہروں کی تعمیر کی مہم چلائی جا رہی ہے۔ اس مہم کے ذریعے پنجاب اور وفاقی حکومت اپنی سازشوں، نااہلی اور کرپشن پر پردہ ڈال رہی ہے۔
اصل میں پنجاب اور وفاق اپنی ناکامی اور لوٹ مار سے عوام کی توجہ ہٹانے کے لیے میڈیا کے ذریعے لوگوں کے ذہن منتشر کر رہے ہیں، اور یہ سب “ڈائیورجنٹ میڈیا تھیوری” کے تحت کیا جا رہا ہے۔
پنجاب کے حکمرانوں نے سندھ دشمنی میں سندھ کو پانی دینے والی تین ندیاں، راوی، ستلج اور بیاس، بھارت کو فروخت کر دیں۔ اگر پنجاب کے حکمران یہ تین ندیاں بھارت کو فروخت نہ کرتے اور یہ ندیاں مسلسل بہتی رہتیں تو آج پنجاب کے عوام کی یہ حالت نہ ہوتی۔ پنجاب دشمن حکمرانوں کی پالیسیوں کے نتیجے میں پنجاب اور سرائیکی وسیب کے عوام سیلاب کی تباہ کاریوں کی لپیٹ میں آ گئے ہیں۔
سیلاب متاثرین کے دکھ، تکالیف اور مصیبتیں بڑھ گئی ہیں۔ سیلاب سے متاثرہ مزدوروں، ہاریوں اور غریب عوام کے گھر، مویشی اور فصلیں بہہ گئی ہیں۔ کئی معصوم افراد جاں بحق ہو گئے ہیں۔ ہم جاں بحق افراد کے خاندانوں کے ساتھ ہمدردی کا اظہار کرتے ہیں اور مطالبہ کرتے ہیں کہ ہر جاں بحق فرد کے خاندان کو 50 لاکھ روپے مالی امداد دی جائے
انہوں نے مزید کہا کہ سندھ مختلف اطراف سے گھیرے میں ہے۔ حکمران سندھ کے وسائل کو ایسے لوٹ رہے ہیں جیسے یہ ان کے لیے مالِ غنیمت ہو۔ اسپیشل انویسٹمنٹ فیسیلیٹیشن کونسل (SIFC) کے کالے قانون کے ذریعے سندھ کی 13 لاکھ ایکڑ زمین “گرین پاکستان” منصوبوں، عرب کمپنیوں اور دیگر ملٹی نیشنل کمپنیوں کو دینے کا سلسلہ جاری ہے۔
اس کے پہلے مرحلے میں پیپلز پارٹی کی سندھ حکومت 52 ہزار ایکڑ زمین کارپوریٹ فارمنگ کرنے والی کمپنیوں کو دے چکی ہے۔ ان زمینوں کو آباد کرنے کے لیے 8 جولائی 2024 کو صدر آصف زرداری نے دریائے سندھ سے چھ نئی نہریں نکالنے کی اجازت دی۔
ملک ریاض، بحریہ ٹاؤن، ڈی ایچ اے، ذوالفقار آباد، کمانڈر سٹی کو سندھ کی لاکھوں ایکڑ زمین دی گئی ہے۔ کارونجھر، کینجھر، ہالیجی، بھنڀور، گورک، گنجو ٹکر، موہنجو دڑو سمیت دیگر تاریخی مقامات کی زمینوں پر قبضے کر کے انہیں نیلام کیا گیا ہے۔
شمالی سندھ کے اضلاع کو ڈاکوؤں کے حوالے کر دیا گیا ہے۔ کچے کے ڈاکوؤں کو نیٹو کے ہتھیار فروخت کیے جاتے ہیں۔ منشیات کی فروخت سندھ بھر میں عام ہے اور اس کاروبار میں پولیس اور مقامی سرکاری وڈیرے ملوث ہیں۔ ترقیاتی کاموں کے نام پر کروڑوں روپے کی کرپشن کی جاتی ہے۔
حالیہ بارشوں میں آپ نے دیکھا کہ کراچی، حیدرآباد، سکھر، بدین، میرپورخاص سمیت چھوٹے بڑے شہر، ٹاؤنز اور دیہات بارش کے پانی میں ڈوب گئے۔ پیپلز پارٹی کے لیے بلدیاتی ادارے اے ٹی ایم مشینیں بن چکے ہیں۔ بدقسمتی سے پیپلز پارٹی کے حکمرانوں کی کرپشن پر کوئی ادارہ نوٹس لینے کے لیے تیار نہیں ہے۔ سندھ کی تقسیم کی سازش، کالا باغ ڈیم، نئے ڈیموں، نہروں، کارپوریٹ فارمنگ اور معدنی وسائل کی نیلامی کے خلاف عوامی تحریک کی طرف سے 24 ستمبر 2025 کو حیدرآباد میں ایک کانفرنس منعقد کی جائے گی۔ اس کانفرنس میں سیاسی و سماجی جماعتوں، ادیبوں، دانشوروں، شاعروں، صحافیوں، وکلاء، اساتذہ، طلباء، ہاریوں اور مزدور رہنماؤں کو دعوت دی جائے گی اور مشترکہ لائحہ عمل بنایا جائے گا۔ عوامی تحریک کی طرف سے 28 ستمبر 2025 کو کندھ کوٹ میں ڈاکو راج، دریائے سندھ کے پانی پر ڈاکوں اور لاقانونیت کے خلاف ریلی نکالی جائے گی، جس میں سندھ کے محب وطن عوام کو شرکت کی دعوت دی جاتی ہے۔
