اسلام آباد (ویب ڈیسک): 58 فیصد پاکستانیوں میں وفاق کی جانب سے صوبوں کو نظر انداز کرنےکا تاثر پایا جاتا ہے۔انسٹیٹیوٹ فار پبلک اوپینیئن ریسرچ نے نیا سروے جاری کردیا ہے۔سروے میں شہریوں کا کہنا تھا کہ وسائل کی تقسیم میں صوبوں کی ساتھ ناانصافی برتی جا رہی ہے۔35 فیصد نے صوبوں کو مناسب توجہ اور وسائل ملنےکا کہا۔وفاق کی جانب سے مناسب وسائل نہ ملنے کی سب سے زیادہ شکایت سندھ سے 74 فیصد افراد نےکی۔ بلوچستان سے 68 فیصد، خیبرپختونخوا سے 65 فیصد جب کہ پنجاب سے سب سےکم 47 فیصد نے وسائل نہ ملنےکا شکوہ کیا۔
اس سوال پر کہ قوم پرست تحریکوں کے پیچھے کیا وجوہات ہوتی ہیں؟ 33 فیصد نے سیاسی محرومیوں کو سب سے بڑی وجہ قرار دیا۔ 21 فیصد نے ترقی کے فقدان، 14فیصد نے غیر ملکی مداخلت، 10فیصد نے ریاستی تشدد جب کہ 6 فیصد نے نسلی امتیاز کو قوم پرست تحریکوں کی اہم وجہ کہا۔
پاکستان کو مضبوط کرنےکے لیے سروے میں 28 فیصد نے حکومت کو جمہوری اداروں کو مستحکم کرنے کا مشورہ دیا۔ 19فیصد نے وسائل کی منصفانہ تقسیم، 16فیصد نے غیر جمہوری قوتوں کی مداخلت کے خاتمے،15 فیصد نے انسانی حقوق کے احترام جب کہ 13 فیصد نے علاقائی شناخت کے احترام کو پاکستان کے استحکام کےلیے اہم کہا۔
سروے میں 66 فیصد پاکستانیوں نے حقیقی نمائندگی نہ ملنےکی شکایت کی، البتہ 27 فیصد نے اس سے اختلاف بھی کیا۔
