اسلام آباد(ویب ڈیسک): سپریم کورٹ فیصلوں اور آرڈر پر نظر ثانی کا بل سینیٹ نے منظور کرلیا۔چیئرمین سینیٹ صادق سنجرانی کی زیر صدارت ہونے والے اجلاس میں مسلم لیگ ن کے سینیٹر عرفان صدیقی نے بل پیش کیا، جس پر اپوزیشن نے شدید احتجاج کیا۔
اپوزیشن ارکان نے بل کی کاپیاں پھاڑ دیں، ایوان میں شدید احتجاج کیا اور چیئرمین ڈائس کے سامنے نعرے لگائے۔ سکیورٹی نے حکومتی اور اپوزیشن بینچز کے درمیان حصار باندھ لیا۔
اپوزیشن ارکان نے توہین عدالت نامنظور کےنعرے لگائے۔
اپوزیشن کے احتجاج کے دوران سپریم کورٹ فیصلوں اور آرڈر پر نظر ثانی کا بل سینیٹ میں منظور کرلیا گیا۔ بل پیش کرنے کی تحریک کے حق میں 32 اور مخالفت میں 21 ووٹ آئے۔
بل کے تحت سپریم کورٹ کے دائرہ اختیار میں توسیع کی جائےگی، سپریم کورٹ میں نظرثانی کی درخواست فیصلہ سنانے والے بینچ سے بڑا بینچ سنےگا، نظر ثانی دائرکرنے والے درخواست گزار کو اپنی مرضی کا وکیل مقررکرنےکا حق ہوگا، جس کےخلاف اس قانون سے قبل آرٹیکل 184 تھری کے تحت فیصلہ آیا ہو وہ درخواست دے سکےگا، نظر ثانی کی درخواست فیصلےکے 60 روز کے اندر دائر کی جائےگی۔
