کراچی (ہیلتھ ڈیسک): کسٹم انٹیلی جنس نے ایک بڑی کارروائی میں 3 کروڑ سے زائد مالیت کے جانوروں کے مضر صحت انجکشن برآمد کر لیے ہیں، جب کہ 4 افراد کو حراست میں لے لیا گیا۔تفصیلات کے مطابق اینٹی اسمگلنگ آرگنائزیشن کسٹم انٹیلی جنس نے جانوروں کو لگانے والے ہزاروں مضر صحت انجکشنوں کی بڑی مقدار بر آمد کر لی، 13 ہزار سے زائد انجیکشنز کی مالیت 3 کروڑ 30 لاکھ روپے ہے۔ڈائریکٹر جنرل کسٹمز انٹیلی جنس فیض احمد کے مطابق بوسٹین (Boostin) نامی انجیکش کی ایک بڑی مقدارمنتقل کرنے کے دوران شاہراہ فیصل پر ایک شخص کو خفیہ اطلاع پر پکڑا گیا۔
مشکوک شخص کے سامان سے ممنوعہ بوسٹین انجیکشن کے پانچ ہزار سے زائد بوسٹر برآمد کیے گئے، گرفتار ملزم کے انکشاف پر ناظم آباد میں گھر سے مزید 8 ہزار بوسٹنگ انجیکشن برآمد ہوئے، اور ایک ملزم گرفتار کیا گیا۔
ملزم نے انکشاف کیا کہ ساتھی مصطفیٰ سکندر عرف مصطفیٰ موتی والا انجیکشن بیرون ملک سے اسمگل کرتے ہیں۔ ملزم کے 3 ساتھیوں میں سے مصطفیٰ سکندر کو سی ویو کلفٹن، محمد علی، منیب کو ناظم آباد اور جانوروں کے ڈاکٹر کو میمن گوٹھ سے گرفتار کیا گیا۔
ڈائریکٹر جنرل کسٹمز انٹیلی جنس کا کہنا تھا کہ منظم نیٹ ورک دنیا کے مختلف ممالک سے دودھ بڑھانے والے انجیکشن کی اسمگلنگ میں ملوث ہے۔
واضح رہے کہ انسانی صحت پر منفی اثرات کی وجہ سے حکومت نے انجیکشنز کی ملک میں درآمد پر پابندی عائد کی ہوئی ہے۔
