کراچی (ہیلتھ ڈیسک): سندھ بھر کے میڈیکل، ڈینٹل کالجز اور جامعات کا داخلہ ٹیسٹ آج ایک مرتبہ پھر ہو رہا ہے۔امیدواروں کے امتحانی مراکز میں داخلے کا وقت صبح 7 سے 9 بجے تک تھا جب کہ امتحان کا دورانیہ صبح ساڑھے 10بجے سےدوپہر 2 بجے تک ہو گا۔ایم بی بی ایس کی 3600 اور بی ڈی ایس کی1190نشستوں کے لیے ہونے والے ایم ڈی کیٹ ٹیسٹ میں 41 ہزار امیدوار امتحان دیں گے، ٹیسٹ میں کراچی سے 15 ہزار اور جامشورو سے 13ہزار امیدوار حصہ لے رہے ہیں۔
اس کے علاوہ نواب شاہ سے 4ہزار اور لاڑکانہ سے 9 ہزارامیدوار ٹیسٹ میں شریک ہو رہے ہیں، ٹیسٹ کے موقع پر سکیورٹی کے انتہائی سخت انتظامات کیے گئے ہیں۔
انتظامیہ کے مطابق امتحانی مراکز میں موبائل فون سمیت الیکٹرانک ڈیوائسز لانے والےکا پرچہ منسوخ کر دیا جائےگا، والدین اور رشتہ داروں کو بھی امتحانی مراکز کے احاطے اور اس کے آس پاس جانے کی اجازت نہیں ہے۔
امتحانی مراکز میں قلم اور پانی کی بوتل انتظامیہ کی جانب سے دی جائیں گی۔
دوسری جانب ایکسپو سینٹر میں داخلہ ٹیسٹ کے باعث یونیورسٹی روڈ، سوک سینٹر اور اسٹیڈیم روڈ پر ٹریفک جام ہے۔
