لاہور (اسپورٹس ڈیسک): قومی ٹیم کے سابق فاسٹ بولر اور پاکستان سپر لیگ کی ٹیم لاہور قلندرز کے ہیڈ کوچ عاقب جاوید نے فاسٹ بولر حارث رؤف کو ٹیسٹ کے بجائے ٹی ٹوئنٹی ورلڈکپ کے لیے تیار کرنے کا مشورہ دے دیا۔حال ہی میں ختم ہونے والے آئی سی سی ورلڈکپ میں قومی ٹیم پانچویں نمبر پر ہی اور پاکستانی بولرز ٹورنامنٹ میں اچھی نہ دکھا سکے، حارث رؤف ورلڈکپ میں مہنگے بولر ثابت ہوئے اور فاسٹ بولر مجموعی طور پر 9 میچز میں 6.89 کی اوسط سے 527 رنز دیکر ٹورنامنٹ کے سب سے مہنگے بولر ثابت ہوئے۔
نجی ٹی وی چینل کے پروگرام میں گفتگو کرتے ہوئے عاقب جاوید کا کہنا تھا حارث رؤف کو خود کو ٹیسٹ کے لیے کلیئر کر دینا چاہیے، جس نے ایک سال سے ٹیسٹ میچ نہیں کھیلا اس پر پریشر کیوں ڈالا جا رہا ہے، آپ نے ایک ٹیسٹ میچ اسے کھلایا تھا اور وہ ڈیڑھ دن میں ان فٹ ہو گیا تھا۔
عاقب جاوید کا کہنا تھا ایسا نہیں ہے کہ آپ نے خواہش ظاہر کی اور آپ ٹیسٹ کرکٹر بن گئے، اس کے لیے سالوں کی پریکٹس درکار ہوتی ہے، آپ کو دن میں دن سے چار اسپیل کرنے پڑ جاتے ہیں، 20 اوورز کرنے پڑ جاتے ہیں، کپتان، کوچ اور مینجمنٹ کو بھی سوچنا چاہیے کہ آپ نے ایک کھلاڑی کو جو ٹیسٹ کے لیے تیار ہی نہیں ہے اسے طویل فارمیٹ کی کرکٹ کھلا کر چھوڑنی ہے یا اس کھلاڑی کو جس فارمیٹ کے لیے وہ تیار ہے اسے اس میں کھلانا ہے، جس طرح حارث رؤف کو دکھایا جا رہا ہے وہ فاسٹ بولر کے ساتھ ناانصافی ہے، اگر حارث آسٹریلیا جاتا اور کھیلتا تو شاید وہ ان فٹ ہو جاتا۔
لاہور قلندرز کے ہیڈ کوچ نے پاکستان کرکٹ ٹیم کی سلیکشن کمیٹی کو مشورہ دیا کہ آپ حارث کو ٹیسٹ کے بجائے اگلے ٹی 20 ورلڈکپ کے لیے تیار کریں، اسے نیشنل ٹی ٹوئنٹی کپ کھلائیں اور نیوزی لینڈ کے خلاف 5 ٹی ٹوئنٹی میچوں کی سیریز کھلائیں اور پھر دیکھیں کہ حارث کو کیسے ٹی ٹوئنٹی ورلڈکپ میں استعمال کیا جا سکتا ہے۔
