تہران(ویب ڈیسک): ایران نے عراق اور شام پر میزائل حملے کردیے جس میں 4 افراد ہلاک ہوگئے۔غیرملکی میڈیا کے مطابق ایرانی پاسداران انقلاب نے دعویٰ کیا ہےکہ اس نے عراق کے علاقے کردستان میں قائم اسرائیل کے انٹیلی جنس ہیڈ کوارٹر پر بیلسٹک میزائل داغے جب کہ شام کے شمالی علاقے میں داعش کے ٹھکانوں پر بھی حملے کیے گئے۔
غیر ملکی میڈیا کے مطابق ریجنل سکیورٹی کونسل کا کہنا ہےکہ کردستان ریجن کے علاقے اربل میں منگل کی صبح 8 دھماکے سنے گئے جس کے نتیجے میں 4 افراد ہلاک اور 6 زخمی ہوئے ہیں۔
سرکاری میڈیا کے مطابق ایرانی پاسداران انقلاب نے دعویٰ کیا ہےکہ علاقے میں ایران مخالف دہشتگرد گروپوں اور انٹیلی جنس سینٹرز کو تباہ کرنے کے لیے بیلسٹک میزائلوں کا استعمال کیا گیا ہے۔
دوسری جانب عراقی حکومت نے ایران کی کارروائی کو جارحیت قرار دیتے ہوئے اس کی سخت مذمت کی اور کہا کہ ایران نے رہائشی علاقے میں حملے کیے جس میں عام شہری مارے گئے۔
عراق نے ایران کے حملے کو ملکی خودمختاری اور اپنے شہریوں کی سلامتی پر حملہ قرار دیا ہے۔
عراقی حکومت نے کہا ہےکہ ایران کے اس حملے پر اقوام متحدہ کی سکیورٹی کونسل میں شکایت سمیت مختلف آپشنز پر غور کررہے ہیں۔
تاہم ایران پاسداران انقلاب کا دعویٰ ہےکہ اس نے اربل میں اسرائیلی انٹیلی جنس موساد کے ہیڈ کوارٹر پرحملہ کیا ہے۔
