حیدرآباد (ویب ڈیسک): سندھ ترقی پسند پارٹی نے سندھ میں بدامنی، بے روزگاری، اور تعلیم کی بہتری کے لیے “آئیں سندھ سنواریں ” کے نام سے احتجاجی تحریک چلانے کا اعلان کیا ہے. جس سلسلے میں پہلے مرحلے میں 7 مئی گھوٹکی، 8 مئی کندھ کوٹ، 9 مئی جیکب آباد سکر، 16 مئی قمبر شهدادکوٹ، 17 مئی لاڑکانہ، 18مئی دادو، 19، مئی نوشہروفیروز، 25، مئی نوابشاھ، 26 مئی سانگھڑ، 27 مئی میرپورخاص، 28 مئی عمرکوٹ ، 29مئی تھرپارکر، 5 جون بدین، 6 جون ٹنڈومحمد خان، 7 جون سجاول، 8 جون ٹھٹہ، 11 جون ٹنڈوالہیار، 12 جون مٹیاری، 25 جون جامشور، 26 جون حیدرآباد اور 7 جولائی کراچی ڈویژن کراچی پریس کلب کے سامنے احتجاجی مظاہرے کئے جائیں گے۔
یہ فیصلہ سندھ ترقی پسند پارٹی کی جانب سے پارٹی کے تنظیمی شعبہ اور پارٹی کی آئین کمیٹی کے مشترکہ اجلاس میں پارٹی کی مرکزی کمیٹی کے فیصلوں کی روشنی میں کیا گیا۔
اجلاس میں سندھ ترقی پسند پارٹی کے وائس چیئرمین حیدر شاہانی، حیدر ملاح، عاشق سولنگی، قادر چنا، ہوت خان گاڈہی، جام شوکت اور دیگر نے شرکت کی۔ اجلاس سے خطاب کرتے ہوئے رہنماؤں نے کہا کہ سندھ میں بڑھتی ہوئی بدامنی، منشیات، بے روزگاری، کرپشن اور مہنگائی کا ذمہ دار حکمران طبقہ ہے، جنہیں عوام کی بجائے اپنے مفادات کی فکر ہے۔
ملک کی معاشی حالت دن بہ دن خراب ہوتی جا رہی ہے اور عوام ایک وقت کےکھانے کے لیے پریشان ہیں۔
حکمرانوں کی کرپشن اور لوٹ مار کی وجہ سے عوام پر مہنگائی کا عذاب ہے اور حکمران خود دن دہاڑے کرپشن سے جائیدادیں بنا رہے ہیں۔
اجلاس میںمزید کہا گیا کہ ایسی صورتحال کے خلاف سندھ ترقی پسند پارٹی سندھ کے بنیادی مسائل کے حل کے لیے عوامی طاقت اور سیاسی جدوجہد سے احتجاجی تحریک چلائے گی۔
اس موقع پر یہ بھی فیصلہ کیا گیا کہ سندھ ترقی پسند پارٹی اور ترقی پسند مزدور فیڈریشن کی طرف سے شکاگو کے شہید مزدوروں کو خراج عقیدت پیش کرنے کے لیے یکم مئی کا دن منایا جائیگا، جس کے تحت سندھ بھر میں ریلیاں اور جلسے کیے جائیں گے۔ جب کہ 19 مئی کو شہید فہیم فاروق عباسی اور 10 جون کو شہید کلمتی اور شہید حسن مگسی کا یومِ شہادت بھی منایا جائے گا۔
