پڈعیدن/ نوشہرو فیروز (ویب ڈیسک): دریائے سندھ پر چھ نئے کینالوں، کارپوریٹ فارمنگ منصوبوں اور ارسا ایکٹ میں ترمیم کے خلاف عوامی تحریک کی جانب سے مسلسل احتجاج، دھرنے، ریلیاں اور مظاہرے جاری ہیں۔ دریائے سندھ پر ہونے والے قبضے کے خاتمے تک جدوجہد جاری رکھنے کا عزم۔ اس سلسلے میں عوامی تحریک کے مرکزی صدر ایڈووکیٹ وسند تھری، مرکزی سینئر نائب صدر نور احمد کاتیار، ضلع نوشہرو فیروز کے صدر لطیف بھٹی،حسین سومرو، ڈاکٹر فدا بھریجو، علی نواز عالماڻج، سرور سنڌی، سلام سومرو، شاہد سولنگی، ستار عمرانی، سندھیانی تحریک کی رہنما مومل ڈاہری، سنا راجپر، سندھ سبیتا اور دیگر رہنماؤں کی قیادت میں پڈعیدن میں ایک بڑی ریلی نکالی گئی، جو شہر کے مرکزی راستے نصرت کینال سے گزرتی ہوئی جلال چوک تک گئی اور پریس کلب کے سامنے ایک جلسہ عام میں تبدیل ہوگئی۔ جلسے سے خطاب کرتے ہوئے رہنماؤں نے کہا کہ دریائے سندھ پر جاری قبضے اور ڈاکوں کے خلاف ہماری جدوجہد جاری رہے گی۔
انہوں نے کہا کہ سندھ کو ڈیڑھ صدی کا حساب چاہیے۔ دریائے سندھ پر ہر قدم پر رکاوٹیں کھڑی کردی گئی ہیں، ڈیموں اور کینالوں نے دریائے سندھ کو ختم کر دیا ہے، انڈس ڈیلٹا مکمل تباہ ہو چکا ہے، سندھ کے لاکھوں لوگ بے روزگار اور دربدر ہو چکے ہیں۔ چولستان کینال بنا کر کروڑوں سندھی عوام کو مارنے کا منصوبہ بنایا گیا ہے۔ دریائے سندھ پر چھ نئے کینال سندھی قوم کی نسل کشی کا حصہ ہیں۔ پنجاب کے حکمران گزشتہ ڈیڑھ صدی سے سندھ کے پانی پر قبضہ کر رہے ہیں۔
رہنماؤں نے کہا کہ کینال اور کارپوریٹ فارمنگ ملکی سالمیت کے لیے خطرہ ہیں، وفاق نے ان منصوبوں کا اعلان کر کے ملک کے وجود پر حملہ کیا ہے۔ پیپلز پارٹی نے حکومت میں ہونے کے باوجود دریائے سندھ پر نئے کینالوں کے خلاف کوئی مؤثر قدم نہیں اٹھایا۔ پیپلز پارٹی نے SIFC (اسپیشل انویسٹمنٹ فیسیلیٹیشن کونسل) کو ختم کرانے کے لیے قومی اسمبلی میں کوئی بھی قانون سازی نہیں کی، پیپلز پارٹی کینالوں کی مخالفت کے ڈرامے کر رہی ہے۔ 8 جولائی 2024 کو صدر زرداری نے کینالون اور ارسا ایکٹ میں ترمیم کی منظوری دی تھی۔
پی ٹی آئی کے رہنما اور ملک کے سابق صدر عارف علوی نے بورڈ آف انویسٹمنٹ ترمیمی بل پر دستخط کر کے ملک دشمن ادارے SIFC کا وجود رکھا۔ پیپلز پارٹی اور پی ٹی آئی دونوں ہی ملک دشمن جماعتیں ہیں۔ رہنماؤں نے کہا کہ پیپلز پارٹی گزشتہ 16 سالوں سے سندھ پر حکمرانی کر رہی ہے، اور اس عرصے میں سندھ صدیوں پیچھے چلا گیا ہے۔ پیپلز پارٹی سندھی عوام کی دشمن ہے، زرداری مافیا نے پورے سندھ کو بیچ دیا ہے۔ پیپلز پارٹی نے سندھ کے دریا کا سودا کر لیا ہے، مگر عوامی تحریک سندھ کے محنت کش عوام کے ساتھ مل کر دریائے سندھ کے تحفظ کے لیے جدوجہد جاری رکھے گی۔
