بلاسپور – بھارت (ویب ڈیسک): بھارتی ریاست ہماچل پردیش میں مسافر بس کے لینڈ سلائیڈنگ کی زد میں آنے سے 15 افراد ہلاک ہوگئے۔بھارتی میڈیا کے مطابق ہماچل پردیش کے ضلع بلاسپور میں گزشتہ شب لینڈ سلائیڈنگ ہوئی جس کی زد میں مسافر بس آگئی۔بھارتی میڈیا کا بتانا ہے کہ لینڈ سلائیڈنگ کی زد میں آکر بس میں سوار 15 افراد ہلاک ہوگئے اور متعدد مسافروں کے ملبے تلے دبے ہونے کی اطلاعات ہیں۔
بھارتی میڈیا کے مطابق 30 سے 35 سوار افراد پر مشتمل بس مروٹن سے گھومروئن کی جانب جارہی تھی کہ یہ افسوس ناک واقعہ پیش آیا، ریسکیو ٹیموں نے اب تک 15 لاشیں نکال لیں اور 4 افراد کو زندہ بچا لیا گیا ہے جس میں ایک بچہ بھی شامل ہے تاہم خراب موسم کے باعث امدادی کاموں میں مشکلات کا سامنا ہے۔
ہماچل پردیش کے وزیراعلیٰ نے واقعے پر گہرے دکھ اور افسوس کا اظہار کرتے ہوئے ریسکیو کارروائیوں کو تیز کرنے کی ہدایت کی ہے۔
دوسری جانب بھارتی وزیر اعظم نریندر مودی نے حادثے پر افسوس کا اظہار کرتے ہوئے مرنے والوں کے لواحقین کے لیے فی کس 2 لاکھ روپے معاوضے کا اعلان کیا ہے۔
