کراچی(نیوز ڈیسک): شرجیل انعام میمن نے ایشیائی ترقیاتی بینک کو تجویز دی ہے کہ ایشیائی ترقیاتی بینک کراچی میں اپنا کیمپ آفس قائم کرے تاکہ پروجیکٹ کی رفتار کو مزید تیز کیا جائے۔
ایک نجی ٹی وی چینل کے مطابق صوبائی وزیر اطلاعات ، ٹرانسپورٹ و ماس ٹرانزٹ شرجیل انعام میمن نے ایشیائی ترقیاتی بینک کو کراچی میں کیمپ آفس قائم کرنے کی تجویز دی ہے تاکہ رابطہ مستحکم ہو اور پاکستان کے پہلے بایو گیس پبلک ٹرانسپورٹ پروجیکٹ ( بی آر ٹی ریڈ لائن پروجیکٹ) میں روز مرہ کی رکاوٹیں اور مسائل خوش اسلوبی سے حل کئے جائیں اور پروجیکٹ کو مقررہ وقت میں مکمل کیا جائے۔
یہ تجویز صوبائی وزیر نے ایشیائی ترقیاتی بینک کے اعلیٰ سطحی وفد سے اپنی رہائش گاہ پر منعقدہ ایک اجلاس میں دی۔
ایشیائی ترقیاتی بینک کے وفد کی سربراہی سینیئر اربن ٹرانسپورٹ اسپیشلسٹ لائیڈ رائٹ کر رہے تھے، جب کہ وفد میں سینیئر آپریشنز منیجر لیزا جین ، سینیئر پروجیکٹ آفیسر شوکت شفیع ، پروجیکٹ کوآرڈینیٹر طاہر شیخ ، کنسلٹنٹ صادق آفتاب بھی شامل تھے۔
اجلاس میں سیکریٹری ٹرانسپورٹ عبدالحلیم شیخ ، ایم ڈی سندھ ماس ٹرانزٹ اتھارٹی زبیر چنہ، جی ایم انفراسٹرکچر ٹرانس کراچی پیر سجاد اور دیگر بھی شریک تھے۔
اجلاس میں ایشیائی ترقیاتی بینک کے تعاون ماڈل کالونی سے نمائش چورنگی تک بی آر ٹی ریڈ لائن پروجیکٹ پر جاری کام کی پیش رفت کا جائزہ لیا گیا اور پروجیکٹ میں حائل رکاوٹوں ، مسائل کے حل سمیت بس ڈیپو اور بایو گیس پلانٹ پر کام کے آغاز کا بھی تفصیلی جائزہ لیا گیا۔
شرجیل انعام میمن نے وفد سے گفتگو کرتے ہوئے کہا کہ سندھ حکومت بی آر ٹی ریڈ لائن پروجیکٹ کی 100 فیصد اونر شپ لیتی ہے ، پروجیکٹ کراچی کی گنجان آبادی میں زیر تعمیر ہے، جس میں کئی محکموں کی انسٹالیشن موجود ہیں، تاہم سندھ حکومت تمام مسائلِ دور کرنے کےلئے کمیٹڈ ہے، پروجیکٹ میں جتنے بھی ایڈمنسٹریٹو مسائل ہیں ، ان کے حل کے لئے سندھ حکومت ہر وقت موجود ہے۔
صوبائی وزیر نے وفد کو آگاہی دی کہ بی آر ٹی ریڈ لائن پروجیکٹ کے لئے کراچی میٹروپولیٹن کارپوریشن نے الہ دین پارک میں بس ڈیپو کی تعمیر کے لیے زمین ٹرانس کراچی کے حوالے کر دی ہے ، جب کہ بھینس کالونی میں بائیو گیس پلانٹ کی تعمیر کے لیے بھی زمین مختص کر دی ہے ، کے ایم سی جلد یہ زمین ٹرانس کراچی کے حوالے کر دے گی۔
شرجیل انعام میمن نے کہا کہ سندھ حکومت بی آر ٹی ریڈ لائن پروجیکٹ مقررہ وقت میں مکمل کرنے کی خواہاں ہے، سندھ حکومت کی جانب سے حال ہی میں پبلک ٹرانسپورٹ کے شعبہ میں شروع کئے گئے کامیاب منصوبوں کے بعد عوام کی دلچسپی ان منصوبوں میں بڑھ گئی ہے، کراچی کی عوام چاہتی ہے کہ انہیں بی آر ٹی ریڈ لائن جلد از جلد سہولت میسر آ جائے۔
رہنما پاکستان پیپلز پارٹی نے ایشیائی ترقیاتی بینک کو تجویز دی کہ بینک کراچی میں اپنا کیمپ آفس قائم کرے تاکہ پروجیکٹ کے روزانہ کے معاملات خوش اسلوبی سے حل ہو سکیں اور پروجیکٹ پر کام کی رفتار مزید تیز ہو، ایشیائی ترقیاتی بینک کے سینئر اربن اسپیشلسٹ لائیڈ رائٹ نے پروجیکٹ میں حائل رکاوٹوں، بالخصوص کے الیکٹرک کی انسٹالیشن کی نشاندہی کی۔
ان کا کہنا تھا کہ محکمہ ٹرانسپورٹ بالخصوص وزیر ٹرانسپورٹ شرجیل انعام میمن نے پروجیکٹ کو اپنا بھرپور وقت دیا ہے، جس سے پروجیکٹ میں بڑی پیش رفت ہوئی ہے۔
صوبائی وزیر ٹرانسپورٹ نے کہا کہ ایشیائی ترقیاتی بینک سندھ حکومت اور محکمہ ٹرانسپورٹ سے ہر ممکن تکنیکی معاونت اور تعاون جاری رکھے گا۔
