اسلام آباد (ویب ڈیسک): سینیٹر اور رہنما پی ٹی آئی فیصل جاوید نے کہا ہے کہ آج ملک میں تاریخ کی سب سے زیادہ مہنگائی ہے لیکن حکومت الیکشن کا اعلان کرے پھر دیکھیں کیسے اسٹاک مارکیٹ اوپر جاتی ہے۔پی ٹی آئی رہنما سینیٹر فیصل جاوید نے اسلام آباد کچہری میں میڈیا سے گفتگو کرتے ہوئے کہا کہ عمران خان سمیت پی ٹی آئی لیڈرشپ پر سیاسی مقدمات بنائے جارہے ہیں اور کرپشن کرنے والے آج ہمیں منی لانڈرنگ کا سبق پڑھا رہے ہیں۔
انہوں نے کہا کہ پی ٹی آئی کو سیاسی انتقام کا نشانہ بنانے سے معیشت بہتر نہیں ہوگی، حکومت گورننس اور عوام پر توجہ دے۔
انہوں نے مزید کہا کہ کہا جاتا ہے پی ٹی آئی حکومت سے بات کرے تو ایک طرف سیاسی مقدمات اور دوسری طرف مذاکرات،ایسا نہیں ہوسکتا، پی ٹی آئی سے مذاکرات کرنے ہیں تو الیکشن کی تاریخ کا اعلان کریں۔
فیصل جاوید کا کہنا تھا کہ پی ٹی آئی کی جس دن حکومت گرائی گئی ملک ترقی کی جانب جارہا تھا، کورونا کے باوجود پی ٹی آئی حکومت نے بہترین پرفارم کیا لیکن مخلوط حکومت کے باعث کئی شعبوں میں عمران خان اصلاحات نہیں کرسکے۔
ان کا کہنا تھا کہ اس معاشی دلدل سے نکلنے کا واحد راستہ ملک میں عام انتخابات ہیں، حکومت الیکشن کا اعلان کریں معیشت بہتری کی جانب گامزن ہوجائے گی۔
انہوں نے کہا کہ حکومت صحافیوں کو گرفتار کر رہی ہے اور آزادی صحافت پر پابندیاں لگا رہی ہے، کچھ میڈیا چینلز کو ٹارگٹ کیا جارہا ہے جبکہ پی ٹی آئی حکومت میں ہوتے ہوئے بھی صحافی کے ساتھ کھڑی تھی ۔
انہوں نے مزید کہا کہ شیخ رشید کو حق اور سچ کی آواز اٹھانے پر گرفتار کیا گیا تاہم پی ٹی آئی شیخ رشید کے ساتھ ہر پلیٹ فارم پر اظہار یکجہتی کر رہی ہے۔
بعدازاں مراد سعید کا کہنا تھا کہ حکومت کی ترجیحات امن نہیں، مخالفین پر پرچے کرنا ہے، ہمارے خلاف مقدمہ کرانا ہے۔
ان کا کہنا تھا کہ پہلے شیخ رشید کو گرفتار کرلیا اور اب منصوبہ بنایا جارہا ہے کہ شیخ رشید پر مزید کیسز کیسے بنائے جائیں جبکہ وہ تو عوامی مسائل پر آواز اٹھا رہے ہیں۔
انہوں نے کہا کہ فواد چوہدری کاکیا قصور تھا؟ انہوں نےتو آئین و قانون پر چلنےکادرس دیاتھا، شہباز گل اور اعظم سواتی نے کیا کیا تھا ،جو انکے ساتھ ایسا سلوک کیا گیا۔
انہوں نے بتایا کہ آج ہر پاکستانی سوال کررہا ہے کہ کیا ملک میں آئین و قانون نہیں ہے۔
