کراچی(ویب ڈیسک): بحیرہ عرب میں بننے والے سمندری طوفان’ بپر جوائے ‘ کے اثرات سے شہر میں گرد آلود تیز ہوائیں چلنا شروع ہوگئیں۔ محکمہ موسمیات کے مطابق مشرق اور شمال مشرق سے 40 کلو میٹر فی گھنٹہ کی رفتار سے ہوائیں چل رہی ہیں، ہواؤں کی رفتار آج 36 سے 45 کلومیٹر فی گھنٹہ رہے گی۔
محکمہ موسمیات کا بتانا ہےکہ شہر کا درجہ حرارت 37.6 ڈگری سینٹی گریڈ ہے اور ہوا میں نمی کا تناسب 37 فیصد ہے۔
دوسری جانب ائیرکوالٹی انڈیکس کے مطابق گرد آلود ہواؤں کے باعث شہر کا فضائی معیار مضر صحت ہے،کراچی دنیا کے آلودہ ترین شہروں میں پہلے نمبر پر ہے جب کہ کراچی کی فضا میں آلودہ ذرات کی مقدار 172 ہے۔
ایک طرف گرد آلود ہوائیں تو دوسری طرف سمندر کے پانی کی سطح میں اضافہ
علاوہ ازیں ممکنہ طوفان کے تحت کراچی کے ساحلی علاقوں میں سمندر کے پانی کی سطح میں اضافہ ہوگیا ہے، سمندر کے پانی میں مسلسل اضافے کے پیش نظر پانی چشمہ گوٹھ کی سڑک کنارے تک پہنچ گیا جب کہ رہائشیوں نے تاحال گھر خالی نہیں کیے ہیں۔
