کراچی (ویب مانیٹرنگ ڈیسک): پاکستان تحریک انصاف (پی ٹی آئی) کے نائب صدر فواد چوہدری نے کہا کہ خیبرپختونخوا اسمبلی تحلیل کرنے کے لیے سمری تیار کر لی گئی ہے اور پنجاب میں نگران وزیراعلیٰ کے نام پر مشاورت شروع کردی گئی ہے۔
لاہور میں میڈیا سے گفتگو کرتے ہوئے فواد چوہدری نے کہا کہ ہم نے پنجاب اسمبلی تحلیل کرنے کی سمری کل گورنر کو بھیج دی تھی اور ہمیں توقع ہے کہ آرٹیکل 112 کے تحت گورنر مزید 48 گھنٹوں کا انتظار نہ کریں اور فوری طور پر اسمبلی کی تحلیل کا حکم نامہ جاری کریں تاکہ نگران حکومت کا عمل شروع ہوسکے۔
ان کا کہنا تھا کہ قائد حزب اختلاف حمزہ شہباز سے باقاعدہ رابطہ کیا جا رہا ہے، پرویز الہٰی انہیں اپنے نام تجویز کریں گے اور انہیں اپنے نام بھیجنے ہیں، امید ہے وہ ایسے نام ہی تجویز میں آئیں گے جو غیرجانب دار ہوں گے، جو صاف اور شفاف انتخابات کرانے کی صلاحیت رکھتے ہوں۔
فواد چوہدری نے کہا کہ الیکشن کمیشن سے بھی یہی امید اور توقع ہے کہ وہ ایسی تعیناتیاں کرے گا جن کی حیثیت مشکوک نہ ہو۔
ایک سوال پر ان کا کہنا تھا کہ ہم نے ناموں پر مشاورت شروع کردی ہے اور وزیراعلیٰ کے لیے ہم اپنے نام چوہدری پرویز الہٰی کو دیں اور ان کی مشاورت سے نام آگے بھیجیں گے کیونکہ آئین کے مطابق وزیراعلیٰ کو ہی نام بھیجنے ہیں۔
ان کا کہنا تھا کہ خیبرپختونخوا کے وزیراعلیٰ اور کابینہ کے اراکین کا آج زمان پارک لاہور آنے کا منصوبہ تھا جو موسم کی خرابی کی وجہ سے منسوخ ہوا لیکن ان سے ٹیلی فون پر تفصیلی بات چیت ہوگئی ہے اور انہوں نے اسمبلی توڑنے کی سمری یا ایڈوائس تیار کر لی ہے۔
خیبرپختونخوا کی اسمبلی کی تحلیل سے متعلق انہوں نے کہا کہ اب صرف انتظار کر رہے ہیں کہ پنجاب اسمبلی کی تحلیل کا وقت پورا ہو یا گورنر اس سے پہلے حکم نامہ جاری کردے تو اس کے فوراً بعد خیبرپختونخوا کی اسمبلی کی تحلیل کا حکم بھی جاری کردیا جائے گا۔
