اسلام آباد (ویب ڈیسک): جی ایچ کیو نے صوبوں میں عام اورضمنی انتخابات کے لیے پاک فوج، رینجرز اور ایف سی دینے سے معذرت کرلی۔جی ایچ کیو کی جانب سے وزارت داخلہ کو مراسلہ موصول ہوا ہے۔ اس حوالے سے ذرائع نے بتایا کہ مراسلے میں جی ایچ کیو نے مؤقف اختیار کیا کہ قومی اسمبلی کے 64 حلقوں اورصوبوں میں انتخابات کےلیے اہلکاروں کی تعیناتی ممکن نہیں ہے۔
ذرائع نے مزید بتایا کہ مراسلے میں کہا گیا کہ صرف راجن پورمیں قومی اسمبلی کے ضمنی انتخاب کےلیے پنجاب رینجرزدوسرے حصارمیں موجود رہے گی۔ خیال رہے کہ الیکشن کمیشن نے ضمنی اورصوبوں میں عام انتخابات کےلیے پاک فوج اوررینجرزکی تعیناتی کی درخواست کی تھی۔
ذرائع نے مراسلہ سے متعلق بتایا کہ جی ایچ کیو نے جواب دیا کہ سیکیورٹی اہلکاردہشت گردی کے خدشے کے پیش نظرملک کی اندرونی اوربارڈرسیکورٹی پرمامورہیں اور سیکورٹی اہلکار27 فروری سے 3 اپریل تک ہونے والی ڈیجیٹل مردم شماری میں مصروف ہوں گے۔
دوسری جانب لاہور ہائیکورٹ کے رجسٹرار نے بھی سیکرٹری الیکشن کمیشن کو خط لکھ کر جوڈیشل افسران کی بطورڈسٹرکٹ ریٹرننگ افسران اور ریٹرننگ افسران تعیناتی سے معذرت کرلی۔ذرائع کے مطابق رجسٹرار لاہور ہائیکورٹ نے لکھا کہ چیف جسٹس کے احکامات کے مطابق الیکشن پرجوڈیشل افسران کی فراہمی سے قاصر ہیں، ہم بھاری دل کے ساتھ آپ سے معذرت کرتے ہیں۔
خط میں کہا گیا ہے کہ پنجاب میں اِس وقت 13 لاکھ 12 ہزار سے زائد زیرالتوا کیسز ہیں، جوڈیشل افسران کی فراہمی سےکیسزکا التوا مزید بڑھ جائے گا۔
رجسٹرارلاہورہائی کورٹ کے خط کے متن کے مطابق پنجاب میں پہلے ہی جوڈیشل افسران کی کمی کاسامناہے، اس وقت پنجاب میں 825 جوڈیشل افسران کی کمی ہے اور الیکشن کمیشن کوجوڈیشل افسران کی فراہمی سےزیرالتواکیسزکی صورتحال مزیدخراب ہوگی۔
