لندن (شوبز ڈیسک): نوبل انعام یافتہ ملالہ یوسفزئی نے کہا ہے کہ طالبان کےخلاف اکٹھا ہونا ہوگا، بتانا ہوگا کہ اسلام میں دہشتگردی کا کوئی جواز نہیں ہے۔
لندن میں آسکرکیلئے شارٹ لسٹ اپنی فلم ’’اسٹرینجر ایٹ دی گیٹ‘‘ کی اسکریننگ میں شرکت کے موقع پر ایک نجی ٹی وی چینل سے بات کرتے ہوئے ملالہ یوسفزئی نے کہا کہ پاکستان میں بڑھتی عسکریت پسندی کے خلاف قیادت امن کی خاطر اکٹھی ہو جائے، سیاسی و مذہبی قیادت دہشتگردی اور عسکریت پسندی سمیت طالبان کو رد کردیں۔
ملالہ یوسف زئی نے کہا کہ اسلام کا نام لیتے ہوئے انتہاپسند ذہنیت کے خلاف مل کر لڑا جائے، طالبان کے خلاف اکٹھا ہونا ہوگا، بتانا ہوگا کہ اسلام میں دہشت گردی کا کوئی جوازنہیں، طالبان کو ہماری روایات، اقدار اور اسلام کو استعمال کرنے کی اجازت نہیں ہونی چاہیے۔
اپنی دستاویزی فلم کے حوالے سے بات کرتے ہوئے ملالہ یوسفزئی نے بتایا کہ فلم کی ایگزیکٹو پروڈیوسر بننے کا فیصلہ اس لئے کیا کہ ہم آہنگی اور معافی کے پیغام کوعام کیا جا سکے۔
ملالہ نے فلم پروڈیوس کرنے کا فیصلہ کیوں کیا؟ دیکھئے pic.twitter.com/Nalnh3AN2l
— Geo News Urdu (@geonews_urdu) February 8, 2023
انکا کہنا تھا کہ دستاویزی فلم امریکی میرین میک کینی کی سچی کہانی پربنائی گئی ہے، میک کینی نے مسجد پر حملے کا منصوبہ بنایا لیکن پھر اسلام قبول کرلیا، فلم میں اسلامو فوبیا، نسل پرستی اور معاف کر دینے کی طاقت کوموضوع بنایا گیا ہے۔
