کراچی (ویب ڈیسک): پاکستان تحریک انصاف (پی ٹی آئی) نے پرویز الہٰی پر اعتماد کے ووٹ پر رائے شماری کیلئے پنجاب اسمبلی میں راتوں رات کارروائی شروع کر دی۔ پنجاب اسمبلی کے اجلاس میں کھانے کا وقفہ کیا گیا ہے اور وزیراعلیٰ پرویز الٰہی گھنٹوں انتظار کرنے کے بعد اسمبلی پہنچ گئے۔
وقفے میں پی ٹی آئی اور ق لیگ کی پارلیمانی پارٹی کا اجلاس وزیراعلیٰ کی زیر صدارت جاری ہے۔
اجلاس میں آج کی تمام صورتحال پر تبادلہ خیال کیا گیا۔ ذرائع نے بتایا کہ آج ایوان میں پاور شو کرنے یا اعتماد کا ووٹ لینے پر مشاورت جاری ہے۔
ایوان میں حاضری رجسٹرز کے مطابق پی ٹی آئی اور ق لیگ کے181 ارکان نے حاضری لگائی ہے۔
دوسری جانب سابق وفاقی وزیر فواد چوہدری نے کہا ہے کہ 187 ارکان کا ہدف پورا کر لیا ہے، مزید کچھ ارکان اجلاس میں شرکت کیلئے روانہ ہو گئے ہیں۔
نجی ٹی وی سے گفتگو میں پنجاب اسمبلی کے ڈپٹی اسپیکر واثق قیوم کا کہنا ہے کہ آج ہم نے اپنے نمبرز پورے ظاہرکردیے ہیں، کہا جارہا تھا ہمارے پاس نمبرز پورے نہیں، ہم نے سوچاان کوآج نمبرزپورےکرکے دکھاتے ہیں، آج قرارداد بھی آسکتی ہے کہ پورا ایوان وزیراعلیٰ پراعتماد کا اظہارکرتا ہے، متوقع قرارداد اعتماد کے ووٹ کی کارروائی نہیں ہوگی۔
انہوں نے کہا کہ اگر 186 سے زائد ارکان قرارداد میں گن لیے گئے تو وزیراعلیٰ کو اعتماد تو مل جائے گا، قرارداد کے ذریعے ارکان کوگنا جاسکتا ہے۔
اُدھر اپوزیشن نے بھی دعویٰ کیا ہے کہ اسمبلی میں پرویز الٰہی کو اکثریت حاصل نہیں رہی۔
