کراچی: پی پی رہنما اور صوبائی وزیر سعید غنی نے کہا ہے کہ اصولی طور پر میئر کراچی پیپلزپارٹی کا ہونا چاہیے جس کے لیے جماعت اسلامی سے بات کریں گے کیونکہ پی ٹی آئی اس لائق نہیں کہ ان سے بات کی جائے۔
ایک نجی ٹی وی چینل کے پروگرام میں گفتگو کرتے ہوئے سعید غنی نے کہا کہ کمپین بنائی جارہی ہے کہ پیپلز پارٹی نے دھاندلی کی ہے، آپ کے پاس شواہد ہیں تو متعلقہ فورم پر جائیں ۔
انہوں نے کہا کہ ہم نے ملیر میں 30 میں سے 20 نشستیں جیتی ہیں، کورنگی میں پیپلزپارٹی نے 37 میں سے 5 نشستیں جیتی ہیں، سینٹرل میں احتجاج ہورہا تھا ، جہاں پیپلز پارٹی نے 45 میں سے 5 نشستیں جیتیں، اگر ڈی آر او غلط کررہا تھا تو کورنگی میں ہماری 5نہیں 20 سیٹیں ہونی چاہیے تھیں۔
سعید غنی کا کہنا تھا کہ جماعت اسلامی نے ہماری توقع سے زیادہ نشستیں لے لی ہیں، حافظ نعیم سمجھ رہے تھے میئربن جائیں گے لیکن انہیں نشستیں کم ملنے پر دھچکا لگا۔
انہوں نے مزید کہا کہ پیپلز پارٹی حیدرآباد میں بھی جیتی ہے اور سندھ کے دیگر علاقوں میں بھی، پی پی نے کئی سالوں میں بہت محنت کی ہے، شہرمیں کئی کام کیے، ضمنی انتخابات میں بھی پیپلزپارٹی کا ووٹ بینک بڑھا ہے، ووٹ کی دوبارہ گنتی پر ہمیں کوئی اعتراض نہیں۔
سعید غنی کا کہنا تھا کہ ہماری دوبارہ گنتی کی درخواست پر بھی کسی کو بھی اعتراض نہیں ہوناچاہیے، ہم سنگل لارجسٹ پارٹی ہیں، میئر بنانا ہمارا حق ہے، پوری کوشش کریں گے کہ پیپلزپارٹی کا میئر کراچی میں آئے، پی ٹی آئی اس لائق ہی نہیں ہے کہ ان سے بات کی جائے،جماعت اسلامی سے بات چیت کریں گے۔
صوبائی وزیر نےکہا کہ کراچی میں پبلک ٹرانسپورٹ میں مزید بہتری کی ضرورت ہے، کراچی میں پینے کا پانی دستیاب نہیں، اس میں بہتری کی کوشش کریں گے، شہریوں کو تفریح کے پارکس بھی کم ہیں، اس پرتوجہ دیں گے،شہر کے انفرا اسٹرکچر کا مسئلہ ہے اس کو بھی ایڈریس کریں گے، سیف سٹی کے منصوبے پر کام ہورہاہے۔
