منصورہ (ویب ڈیسک): امیر جماعت اسلامی سراج الحق کا کہنا ہے توشہ خانہ سے جس کسی نے بھی مال لوٹا سب کا بلا تفریق احتساب ہونا چاہیے۔منصورہ میں ایک تقریب کے بعد صحافیوں سے گفتگو کرتے ہوئے امیر جماعت اسلامی کا کہنا تھا ملک میں حقیقی انقلاب کی ضرورت ہے جو ووٹ کی طاقت سے ہی ممکن ہے لیکن موجودہ حکمران کسی صورت بھی مقررہ وقت پر انتخابات نہیں کروانا چاہتے۔
سراج الحق نے چیئرمین پی ٹی آئی عمران خان کی گرفتاری پر ردعمل دیتے ہوئے کہا کہ توشہ خانہ کیس میں عمران خان کو گرفتار اور نا اہل کیا گیا، اس عدالتی فیصلہ پر ان کے پاس اپیل کا موقع موجود ہے۔
امیر جماعت اسلامی کا مزید کہنا تھا میں چاہتا ہوں کہ ان تمام لوگوں کو سمن کیا جائے اور ان کا آڈٹ کیا جائے جنھوں نے کسی نہ کسی صورت میں توشہ خانہ سے استفادہ کیا ہے، ان تمام چہروں کو بےنقاب کرنا اور سب کا احتساب کرنا قوم کا مطالبہ ہے۔
ان کا کہنا تھا وقت آئے گا کہ سیاستدانوں، ججوں اور جرنیلوں میں سے جس جس نے قومی خزانے سے کھیلا ہے، ان کا بےلاگ اور شفاف احتساب ہوگا۔
واضح رہے کہ اسلام آباد کی سیشن عدالت نے توشہ خانہ کیس میں عمران خان کو تین سال قید کی سزا سنائی ہے جس کے بعد چیئرمین پی ٹی آئی کو لاہور سے گرفتار کر لیا گیا۔
اسلام آباد کی ڈسٹرکٹ اینڈ سیشن عدالت نے چیئرمین تحریک انصاف عمران خان کو تین سال قید کی سزا سنائی اور ایک لاکھ روپے جرمانہ بھی عائد کیا۔
عدالت نے اپنے فیصلے میں کہا کہ اگر عمران خان ایک لاکھ روپے جرمانہ نہیں دیں گے تو 6 ماہ مزید قید ہوگی۔
