واشنگٹن (ویب ڈیسک): امریکی ڈیموکریٹ سینیٹرز نے اسرائیل اور سعودی عرب کے درمیان ممکنہ معاہدے پر اظہار تشویش کرتے ہوئے صدر جو بائیڈن کو خط لکھ دیا۔غیر ملکی خبر ایجنسی کے مطابق 20 ڈیموکریٹ سینیٹرز نے امریکی صدر جو بائیڈن کو خط لکھا ہے جس میں انہوں نے اسرائیل سے تعلقات کی بحالی پر سعودی عرب کو ممکنہ سکیورٹی گارنٹی یا جوہری تعاون کی فراہمی پر تشویش کا اظہار کیا ہے۔
صدر جو بائیڈن کو لکھے گئے خط میں سینیٹرز نے اس بات پر زور دیا کہ اگر واشنگٹن نے ریاض کے مطالبات کو پورا کیا تو وائٹ ہاؤس کو کانگریس کی جانب سے مزاحمت کا سامنا کرنا پڑ سکتا ہے۔
ڈیموکریٹ سینیٹرز نے لکھا کہ اسرائیل اور اس کے پڑوسیوں کے درمیان امن امریکا کی خارجہ پالیسی کا ایک دیرینہ مقصد رہا ہے اور ہم کسی بھی معاہدے کے بارے میں کھلے ذہن کو برقرار رکھے ہوئے ہیں جو ممکنہ طور پر سعودی عرب اور اسرائیل کے درمیان سیاسی، ثقافتی اور اقتصادی تعلقات کو گہرا کرے۔
