لاہور (اسپورٹس ڈیسک): پاکستان کے سابق کپتان مصباح الحق کا کہنا ہےکہ ہمارے پاس ورلڈکپ جیتنے کا بہترین موقع ہے۔لاہور میں میڈیا سےگفتگو کرتے ہوئے مصباح الحق نےکہا کہ پاکستان کے 3 بلے باز آئی سی سی رینکنگ میں ٹاپ پر ہیں، بولنگ پاکستان کی بہت زبردست ہے، انڈین پچز بیٹرز کیلئے سازگار ہوتی ہیں، یہ آئیڈیل وقت ہے، پاکستان ٹیم کے پاس اچھی تیاری کرنے کا موقع ہے۔انہوں نے کہا کہ کنڈیشنز کو دیکھتے ہوئے بہترین ٹیم کا انتخاب کرنا ہوگا، ابھی سے پلاننگ کی جائے تو ورلڈ کپ کیلئے ٹیم تیار کر سکتے ہیں،پاکستان ٹیم کو ون ڈے کی پریکٹس نہیں مل رہی اس پر کام کرنا ہوگا، غیر ملکی کوچز اپنے اپنے گھروں میں چلے جاتے ہیں تو قومی ٹیم ٹریننگ کیسے کرےگی، آپس میں میچز کروائے جاسکتے ہیں، زیادہ ون ڈے کرکٹ کھیلنے کے مواقع بنانے چاہئیں ،دوسری طرف انھوں نے کہا کہ پی ایس ایل کی پاکستان میں مقبولیت زیادہ ہے، پی ایس ایل کو یو اے ای منتقل کرنے کے بارے میں سوچنا بھی نہیں چاہیے۔
ایشیاکپ اور ورلڈکپ کے حوالے سے بات کرتے ہوئے سابق ٹیسٹ کپتان کا کہنا تھا کہ پاکستان بھارت کرکٹ کے حوالے سے دونوں حکومتوں کو فیصلہ کرنا چاہیے،کھیلوں کو سیاست سے الگ کیا جائے اور دونوں ممالک کو آپس میں کھیلنا چاہیے۔
بابر اعظم سے متعلق بات کرتے ہوئے مصباح الحق نے کہا کہ بطور کپتان بابر اعظم کی بیٹنگ بہتر ہوئی ہے اور وہ اچھا کھیل رہا ہے ،کپتانی کے بارے میں فیصلہ بابر اعظم نے ہی کرنا ہے، وہ خود فیصلہ کریں کہ انہیں کسی فارمیٹ کی کپتانی چھوڑنی ہے یا نہیں۔
ملکی صورتحال کے سوال پر مصباح الحق نے کہا کہ 9 مئی کو جو بھی ہوا اچھا نہیں ہوا، بطور شہری کوئی بھی نقصان کرتے ہیں اس سے ملک کا نقصان ہوتا ہے۔
