اسلام آباد (ویب ڈیسک): وفاقی وزیر توانائی اویس لغاری نے کہا ہےکہ پاکستان اور روس کے تعلقات پر مغرب کو ناراض نہیں ہونا چاہیے۔روسی میڈیا کو دیے گئے انٹرویو میں اویس لغاری نے کہا کہ ہم پاک روس تعلقات سے دونوں ممالک کے عوام کو فائدہ پہنچانا چاہتے ہیں، پاک روس تعلقات نہ کسی کو نقصان پہنچانے کے لیے اور نہ کسی کے مفاد کے خلاف ہیں، پاکستان روس تعلقات پر مغرب کو ناراض نہیں ہونا چاہیے، یہ فوائد اقتصادی فوائد میں تبدیل ہوجائیں گے۔
وزیر توانائی نے کہا کہ تیسری دنیاکے ممالک کی ترقی کے لیے عالمی طاقتوں کے درمیان مؤثر اور مسلسل رابطہ ناگزیر ہے، مارچ سے پاکستان اور روس کے درمیان آزمائشی مال بردار ٹرین چلے گی، ہم پاکستان اور روس کے درمیان براہِ راست فضائی سروسز کے قیام پر غور کررہے ہیں۔
اویس لغاری کا کہنا تھا کہ پاکستان کو برکس کے اندر رکن ممالک سے بہتر اور قریبی علاقائی تعاون کا فائدہ ہوسکتا ہے۔
