لاہور: مسلم لیگ ق کے رہنما مونس الہٰی نے چیئرمین پاکستان تحریک انصاف (پی ٹی آئی) عمران خان سے زمان پارک میں ملاقات کی اور سیاسی امور پر تبادلہ خیال کیا۔
ذرائع کے مطابق پی ٹی آئی کے رہنما فواد چوہدری بھی ملاقات میں شریک تھے۔
ذرائع کا کہنا ہےکہ ملاقات میں وزیراعلیٰ پنجاب پرویز الہٰی کے بیان سے پیدا ہونے والی صورت حال پربات چیت کی گئی۔
ذرائع کے مطابق پرویز الہٰی کے صاحبزادے مونس الہٰی نے والد کے بیان کے حوالے سے اپنے مو قف سے عمران خان کو آگاہ کیا۔
خیال رہے کہ لاہور میں صحافیوں سے غیر رسمی گفتگو کرتے ہوئے پرویز الہٰی کا کہنا تھا جب عمران خان جنرل باجوہ کے خلاف بات کر رہے تھے تو مجھے بہت برا لگا۔
ان کا کہنا تھاکہ جنرل باجوہ ہمارے محسن ہیں، محسنوں کے خلاف بات نہیں کرنی چاہیے، جنرل باجوہ کے ان پر بہت احسانات ہیں، احسان فراموشی نہ کی جائے۔
ذرائع کے مطابق عمران خان سے پرویز الٰہی کے صاحب زادے مونس الٰہی نے لاہور کے زمان پارک میں ملاقات کی جو 30 منٹ تک جاری رہی۔
ملاقات میں عمران خان کو مونس الٰہی نے پرویز الٰہی کےحالیہ بیان پر اعتماد میں لیا تاہم چیئرمین پی ٹی آئی نے وزیر اعلیٰ پنجاب کے بیان پر شکوہ کیا۔
دونوں رہنماؤں نے ملاقات میں اتفاق کیا کہ ہم اتحادی ہیں، ہمیں مل کر چلنا چاہیے۔ عمران خان سے ملاقات کے بعد مونس الٰہی روانہ ہوگئے۔
ابھی تھوڑی دیر پہلے PM عمران خان @ImranKhanPTI سے ملاقات ہوئی ہے۔ ہمارا اتحاد قائم و دائم ہے اور انشاءاللہ رہے گا۔ ن لیگ اپنا ماتم جاری رکھے۔ pic.twitter.com/Kploo9N2cX
— Moonis Elahi (@MoonisElahi6) December 18, 2022
خیال رہے کہ پرویز الٰہی عمران خان کی گزشتہ روز کی تقریر پر ان سے ناراض ہیں۔ پرویز الٰہی اے آر وائی نیوز کو خصوصی انٹرویو میں جنرل (ر) قمر جاوید باجوہ کی حمایت میں کھل کر سامنے آگئے۔
وزیر اعلیٰ پنجاب نے کہا: ’جب خان صاحب جنرل (ر) باجوہ کے خلاف بات کر رہے تھے تو مجھے بہت برا لگا۔ میں سمجھتا ہوں جنرل (ر) باجوہ کے ان پر بہت احسانات ہیں الہٰذا احسان فراموشی نہ کی جائے۔ اگر جنرل (ر) باجوہ کے خلاف بات کی گئی تو میری ساری پارٹی بولے گی۔ اب اگر کسی نے باجوہ کے خلاف بات کی تو اس کے خلاف سب سے پہلے میں بولوں گا۔‘
