اسلام آباد (ویب ڈیسک): انسداد دہشت گردی عدالت اسلام آباد نے بھارتی خفیہ ایجنسی (ر ا) کو معلومات فراہم کرنے کے الزام میں گرفتار 5 ملزمان کو مزید 4 روزہ جسمانی ریمانڈ پر پولیس کے حوالے کردیا۔اسلام آباد پولیس کی جانب سے بھارتی خفیہ ایجنسی را سے رابطہ رکھنے والے 5 ملزمان کو انسداد دہشت گردی عدالت پیش کیا گیا۔ملزمان میں معیز احمد، مہران یونس، فیضان کیانی، ارسلان واجد اور نعمان ستار شامل ہیں۔
جج ابو الحسنات محمد ذوالقرنین نے ملزمان سے مخاطب ہو کر کہا کہ آپ لوگوں کا کیا مسئلہ ہے؟ ریمانڈ میں صرف ایسے آنا جانا نہیں چلتا رہےگا، کیا آپ کو اپنا ملک پیارا نہیں؟ اس دھرتی نے آپ کو پالا پوسا ہے۔
ملزمان نے جواب دیا کہ ہمیں ہمارا ملک پیارا ہے، جس پر جج ابو الحسنات محمد ذوالقرنین نے ریمارکس دیےکہ ہمارے ملک کی کیا یہ قیمت ہے جو آپ نے کیا ہے؟
ملزمان نے جواب دیا کہ ہم نے ملک کی خدمت کی ہے، مسجد کے نام پر پیسے لینے پر پھنسایا گیا ہے۔
جج ابو الحسنات ذوالقرنین نے ریمارکس دیےکہ اتنی بڑی رقم سامنے آئی ہے، آپ احساس کریں، دنیا میں بھی جواب دینا ہے اور آخرت میں بھی، پیسا یہیں رہ جائےگا، دنیا میں لالچ بہت ملےگی، ایسی سوچ چھوڑ دیں، اچھا انسان بننے کی کوشش کریں، ملک کمزور ہے، معیشت کمزور ہے، درخواست ہے کہ دھرتی پر کرم کریں۔
عدالت نے پانچوں ملزمان کو مزید 4 روزہ جسمانی ریمانڈ پر پولیس کے حوالے کردیا۔
خیال رہے کہ پانچوں ملزمان پر بھارتی خفیہ ایجنسی را کو معلومات فراہم کرنے پر تھانہ سی ٹی ڈی میں مقدمہ درج کیا گیا تھا۔
