لیاری یونیورسٹی کے رجسٹرار کی تقرری کا اشتہار سینڈیکیٹ کی منظوری سے شائع کیا گیا؛ افواہیں بدنیتی پر مبنی ہیں؛ پی آر او

کراچی (ویب ڈیسک): بےنظیر بھٹو شہید یونیورسٹی لیاری کے پی آر او نے یونیورسٹی اعلامیہ جاری کرتے ہوئے کہا ہے کہ حال ہی میں لیاری یونیورسٹی کے رجسٹرار کی تقرری کے لیے ایک باقاعدہ اور قانونی اشتہار جس کی منظوری سینڈیکیٹ سے لی گئی تھی اخبارات میں شائع کیا گیا مگر بدقسمتی سے، کچھ عناصر جنہیں لیاری کی ترقی پسند نہیں، انہوں نے اشتہار کو بدنیتی سے غلط انداز میں پیش کیا، کیونکہ وہ نہیں چاہتے کہ لیاری کے طلبہ و طالبات ملک کے دیگر طلبہ کے ساتھ مقابلہ کریں۔ یہ عناصر سازشوں میں ملوث ہو کر شفافیت پر حملہ آور ہوئے۔ جو لوگ اس پروپیگنڈے میں شامل ہیں یا جو قانون کے خلاف کام کر رہے ہیں، یونیورسٹی انتظامیہ ان کے خلاف سخت قانونی کارروائی کا حق محفوظ رکھتے ہیں۔
انہوں نے اعلامیہ میں یہ بھی کہا ہے کہ یہ اشتہار اردو، سندھی اور انگریزی اخبارات میں شائع کیا گیا تھا، جس میں محکمہ اطلاعات کا منظور شدہ نمبر بھی درج ہے۔ یہ تمام سرکاری اداروں کی ویب سائٹس پر موجود ہے اور ہر جگہ اس کی توثیق ہو چکی ہے۔ یونیورسٹی انتظامیہ اس بے بنیاد پروپیگنڈے کی سختی سے تردید کرتی ہے اور یونیورسٹی واضح طور پر اس کا نوٹس لیتی ہے۔