اسلام آباد (ویب ڈیسک): وزیر اعظم شہباز شریف نے صوبوں سے دہشت گردی کی تازہ لہر سے نمٹنے کے لیے کے لیے ہر ممکن اقدامات اٹھانے کی ہدایت کی ہے۔ایک ملکی انگریزی اخبار کی رپورٹ کے مطابق وزیراعظم کی جانب سے یہ ہدایات گزشتہ روز دہشتگردی کی نئی لہر سے متعلق قومی سلامتی کے اعلیٰ سطح کے اجلاس کے دوران آئی جی پنجاب اور چیف سیکریٹری کی جانب سے صورتحال کی خوفناک منظرکشی کے بعد جاری کی گئیں۔
سیکیورٹی اجلاس کی صدارت کرتے ہوئے وزیراعظم نے وزیر داخلہ رانا ثنا اللہ کو ہدایت کی کہ وہ تمام صوبوں کا دورہ کریں تاکہ صوبائی حکومتوں کے ساتھ مل کر دہشت گردی کی نئی لہر کا مقابلہ کیا جاسکے۔
انہوں نے وفاقی وزارت داخلہ اور صوبائی حکومتوں کو ہدایت کی کہ انسداد دہشت گردی کے محکموں کو نئے سرے سے فعال کیا جائے، سیکیورٹی اہلکاروں کو جدید ترین ہتھیاروں اور آلات سے لیس کیا جائے، ان کے درمیان مؤثر رابطے کو یقینی بنایا جائے اور سیف سٹی پراجیکٹس (شہروں میں سی سی ٹی وی کیمروں کے نیٹ ورک) کی کارکردگی کو بہتر بنایا جائے۔
وزیر اعظم آفس کے مطابق وزیر اعظم شہباز شریف نے ایپکس کمیٹی کے فیصلوں پر عمل درآمد کا حکم بھی دیا۔
اجلاس سے واقف ذرائع بتایا کہ آئی جی پنجاب اور چیف سیکرٹری نے اجلاس کو آگاہ کیا کہ ملک کے بڑے شہروں اور خصوصاً پنجاب میں شرپسند داخل ہوچکے ہیں۔
انہوں نے اسی طرح کی بریفنگ 6 فروری (پیر) کو پنجاب میں صوبائی اسمبلی کے انتخابات کے امکانات کا جائزہ لینے کے لیے منعقدہ اجلاس کے دوران چیف الیکشن کمشنر سکندر سلطان راجا کو بھی دی۔
انہوں نے یکم فروری کو میانوالی کے ایک پولیس اسٹیشن میں کچھ دہشت گردوں کی جانب سے ناکام کوشش کا حوالہ دیتے ہوئے بتایا کہ دہشت گرد، خواتین کے بھیس میں ایک قریبی مسجد میں چھپے ہوئے تھے۔
