اسلام آباد (ویب ڈیسک): چیئرمین پاکستان تحریک انصاف عمران خان نے کہا کہ انہوں نے روسی صدر ولادمیر پیوٹن سے سستا تیل خریدنے کی بات کر لی تھی مگر جب واپس آیا تو جنرل باجوہ (اس وقت کے آرمی چیف) نے کہا یوکرین حملے پر روس کی مذمت کریں۔ایک بیان میں عمران خان نے کہا ہے کہ انہوں نے روسی صدر سے سستا تیل خریدنے کی بات کر لی تھی مگر جب واپس پاکستان آئے تو جنرل قمر جاوید باجوہ نے کہا یوکرین حملے پر روس کی مذمت کریں، جب آرمی چیف کو بھارت کی طرح نیوٹرل رہنے کا مشورہ دیا تو انہوں نے خود روس کی مذمت کر دی۔
ہم روس سے سستا تیل اور گندم لینے جا رہے تھے، جبکہ ایک "عظیم" بائیسویں گریڈ کے آفیسر نے محض امریکی خوشنودی کیلئے روس کی مذمت کر دی۔ نتیجتاً ساری قوم مہنگائی بھگت رہی ہے: pic.twitter.com/df6mHM9tTR
— PTI Scientist (@PTI_Scientist) February 13, 2023
چیئرمین پی ٹی آئی کا کہنا تھا ایک گریڈ 22 کے افسر نے امریکا کو خوش کرنے کے لیے سیمینار میں فارن پالیسی بیان دیا، جب امریکا کو خوش کرنے کے لیے فیصلے ہوں گے تو یہی ہو گا جو ہو رہا ہے، امریکا کو خوش کرنے کے لیے ہی دہشتگردی کی جنگ میں 80 ہزار لوگوں کو مروایا گیا تھا۔
عمران خان کا یہ بھی کہنا تھا آئین کہتا ہے کہ 90 دن میں الیکشن کراؤ مگر یہ کہتے ہیں پیسے نہیں ہیں، یہ لوگ نئے نئے بہانے کر رہے ہیں۔
دوسری جانب عمران خان کی زیر صدارت اجلاس میں الیکشن 90 دن میں نہ ہونے کی صورت میں آئین بچاؤ تحریک شروع کرنے کا فیصلہ کیا گیا اور عمران خان نے اس حوالے سے وکلا ونگ کو متحرک ہونے کی ہدایت بھی کر دی ہے۔
