ورجینیا (ویب ڈیسک): امریکی حکام نے یمن کو اسلحہ اسمگلنگ کرنے کے الزام میں پاکستان کی شناختی دستاویز رکھنے والے 4 افراد سمیت 14 ملزمان کو گرفتار کرلیا۔گرفتارافراد کی شناخت محمد پہلوان، محمدمظہر،غفران اللہ اور اظہار محمد کے ناموں سے ظاہر کی گئی ہے۔
ایران سےحوثیوں کو اسلحہ اسمگل کرنے کے الزام میں گرفتار دیگر 10 افراد کی شناخت ظاہر نہیں کی گئی،گرفتار افراد امریکی ریاست ورجینیا منتقل کیے گئے ہیں۔
عدالتی دستاویز کے مطابق چاروں افراد 11جنوری کو صومالیہ کے ساحل سے دور ایک بحری جہاز سے پکڑے گئے۔
امریکی حکام کا دعوی ٰ ہے کہ جہاز کی تلاشی کے دوران ایرانی ساختہ جدید ہتھیار بھی برآمد ہوئے۔عدالتی دستاویز کے مطابق ہتھیاروں میں میڈیم رینج بیلسٹک میزائل،اینٹی کروز شپ میزائل شامل ہیں۔
ترجمان امریکی محکمہ خارجہ کے مطابق امریکی محکمہ انصاف نے غیر سیل شدہ فرد جرم پر بیان جاری کرتے ہوئے کہا کہ یہ ایک جاری قانونی معاملہ ہے، مزید تبصرہ نہیں کرسکتے۔
