بنگلور (شوبز ڈیسک): بھارتی سپر اسٹار رجنی کانت کی فلم ‘جیلر’ دنیا بھر میں 10 اگست کو ریلیز ہونے جارہی ہے اور بھارت کی جنوبی ریاست تامل ناڈو میں فلمی شائقین اپنے جوش و خروش پر قابو نہیں رکھ پا رہے۔بھارتی میڈیا رپورٹس کے مطابق ریاست تامل ناڈو میں بیشتر ملازمین نے اپنے دفاتر میں فلم کی ریلیز والے روز چھٹی کی درخواستیں دی ہیں۔
اسی کے پیشِ نظر ریاست کی 2 کمپنیوں نے 10 اگست یعنی جمعرات کو عام تعطیل کا اعلان کیا ہے، ان میں سے ایک کمپنی نے تو چنئی، بنگلورو، تریچی، ترونیل ویلی، چنگل پٹو، متوتھاوانی، اراپالیم اور الگاپن نگر میں بھی اپنی کمپنیوں کو بند رکھنے کا اعلان کیا۔
اس حوالے سے کمپنی کی جانب سے آفیشل نوٹیفکیشن بھی جاری کیا گیا ہے۔
دوسری جانب دکن ہیرالڈ کے مطابق سری لنکا کے دو شہری جیلر کا ‘فرسٹ ڈے، فرسٹ شو’ دیکھنے کے لیے چنئی پہنچے ہیں، اس سے قبل دو جاپانی شہری بھی ٹوکیو سے چنئی رجنی کانت کی فلم دیکھنے پہنچے تھے۔
فلم کے ٹریلر نے پہلے ہی انٹرنیٹ پر دھوم مچا رکھی ہے جیسے ہی ٹریلر پوسٹ کیا گیا تو شائقین نے کمنٹ سیکشن کو دل اور فائر ایموجیز سے بھر دیا۔
رجنی کانت کی فلم کی ریلیز بھارت میں کسی تہوار سے کم نہیں، لوگوں کو جس فلم کا بے صبری سے انتظار ہے اس کے ڈائریکٹر اور رائٹر نیلسن ہیں، رجنی کانت کے علاوہ جیلر میں بالی وڈ اداکار جیکی شروف اور اداکارہ تمنا بھاٹیا اداکاری کے جوہر دکھائیں گی۔
