سانتا باربرا کاؤنٹی امریکا (شوبز ڈیسک): امریکی گلوکارہ، اداکارہ، پروڈیوسر اور کاروباری خاتون سلینا گومز نے اپنے بوائے فرینڈ اور میوزک پروڈیوسر بینی بلانکو سے شادی کرلی۔33 سالہ سلینا گومز اور 37 سالہ بلانکو کی شادی کی تقریب جنوبی کیلیفورنیا کے علاقے سانتا باربرا کاؤنٹی کے ہوپ رینچ میں منعقد ہوئی، جو لاس اینجلس کے شمال مغرب میں تقریباً 90 میل (145 کلومیٹر) کے فاصلے پر واقع ہے۔سلینا گومز نے کچھ دن قبل فیشن میگزین ’وینٹی فیئر‘ کو دیے گئے انٹرویو میں پہلی بار اپنی طبی پیچیدگیوں پر بھی کھل کر بات کی۔انہوں نے واضح طور پر بتایا کہ پیچیدگیوں کی وجہ سے وہ اپنے بچوں کو اپنے پیٹ میں نہیں پال سکیں گی، ان کا جسم بچے کا وزن برداشت نہیں کر پائے گا۔
سلینا گومز کا کہنا تھا کہ ڈاکٹرز انہیں بتا چکے ہیں کہ اگر کبھی انہوں نے بچوں کو اپنے پیٹ میں پالنے اور انہیں پیدا کرنے کی کوشش کی تو وہ قدم ان کے لیے اور بچے کے لیے خطرناک ثابت ہوگا۔
اور اب سلینا گومز نے انسٹاگرام پر شادی کی تصاویر اور ویڈیوز شیئر کیں، جن میں انہیں سفید دلکش لباس میں اور بلانکو کو سیاہ ٹکسڈو میں دیکھا جاسکتا ہے، دونوں کو تصاویر اور ویڈیوز میں رومانوی انداز میں ایک دوسرے کے قریب دیکھا گیا۔
پوسٹ کے کیپشن میں سلینا گومز نے 9.27.25 کی تاریخ درج کی، جس کے تبصرے میں بینی بلانکو نے لکھا کہ ان کی حقیقی زندگی کی بیوی۔
شادی میں تقریباً 170 مہمان شریک ہوئے جن میں امریکی پاپ اسٹار اور سلینا گومز کی دیرینہ بہترین دوست ٹیلر سوئفٹ، برطانوی گلوکار و نغمہ نگار ایڈ شیئرن، پیرس ہلٹن اور سیلینا کے ڈرامے اونلی مرڈرز کے شریک اداکار اسٹیو مارٹن اور مارٹن شارٹ شامل تھے۔
ووگ میگزین کے مطابق جوڑے نے شادی کے موقع پر رالف لارین کے تیار کردہ ملبوسات پہنے۔سلینا گومز اور بینی بلانکو نے اپنے تعلق کا اعلان دسمبر 2023 میں کیا تھا اور ایک سال بعد منگنی کی تھی۔
بینی بلانکو نے سلینا گومز کے کئی مقبول گانوں کی پروڈکشن میں حصہ لیا ہے جن میں 2015 کے گانے سیم اولڈ لو اور کل ایم وِد کائنڈنیس شامل ہیں، دونوں نے مارچ میں مشترکہ البم آئی سیڈ آئی لو یو فرسٹ بھی ریلیز کیا تھا۔
