اسلام آباد(مانیٹرنگ ڈیسک): اسپیکر قومی اسمبلی راجا پرویز اشرف نے کہا ہےکہ پی ٹی آئی کے چیف وہپ عامر ڈوگر آج ملاقات کے لیے نہیں آئے اور انہوں نے اب کل ملاقات کا کہا ہے۔
پارلیمنٹ ہاؤس میں صحافیوں سے گفتگو کرتے ہوئے راجا پرویز اشرف نے کہا کہ ملک کی بہتری اور بھلائی کے لیے تمام جماعتیں پارلیمنٹ میں بھرپورکردار ادا کریں، سیاست سب کا حق ہے مگر عوام کا مفاد سب سے اہم ہے لہٰذا عوامی مفاد پرکوئی سمجھوتا نہیں ہوسکتا۔
اسپیکر قومی اسمبلی نے بتایا کہ پی ٹی آئی کے چیف وہپ نےگزشتہ روز مجھ سے ملاقات کے لیے رابطہ کیا تھا، میں نے آج اسمبلی آفس میں پہنچ کر خود عامر ڈوگر سے رابطہ کیا، میں نے بتایا کہ میں اسپیکر آفس پہنچ گیا ہوں ملاقات کے لیے آجائیں اس پر پی ٹی آئی کے چیف ویپ نے کل ملاقات کا کہا ہے۔
انہوں نے کہا کہ عامرڈوگر نے بتایا پی ٹی آئی کے چند لوگ استعفےکے معاملے پر ملاقات کرنا چاہتے ہیں، میں نےکہا کہ جتھے کی صورت میں ملاقات نہیں ہوگی، رولزکے مطابق سب ممبران سے الگ الگ ملاقاتیں ہوں گی، پی ٹی آئی کےارکان اسمبلی کے استعفے اپنے ہاتھ سے لکھےہوئے نہیں ہیں جب کہ قواعد کے مطابق ہر رکن کو اپنے ہاتھ سے اپنا استعفیٰ لکھنا لازم ہے، کچھ ارکان نے استعفے منظور نہ کرنے کی استدعا کی ہے جن ارکان نے مجھ سے استعفے منظور نہ کرنے کی استدعا کی ان کا نام اور تعداد نہیں بتاسکتا۔
راجا پرویز اشرف کا کہنا تھا کہ میں عجلت میں پی ٹی آئی کےاستعفے منظور نہیں کروں گا، استعفے قواعد وضوابط کے مطابق منظور ہوں گے، میں سب کا اسپیکر ہوں،کسی ایک سیاسی جماعت کا نہیں، ملکی مسائل کا واحد حل پارلیمنٹ کا فورم ہے اور پی ٹی آئی کو کہوں گا پارلیمنٹ میں اپنا کردار ادا کریں، اس جماعت میں بھی سنجیدہ پارلیمنٹیرین موجود ہیں جو میری بات پرغورکریں گے۔
انہوں نے مزید کہا کہ کورم پورا کرنا اسپیکر کا کام نہیں، پارلیمنٹ میں موجود سیاسی جماعتیں کورم کا مسئلہ حل کریں، تمام ممبران پرفرض ہےکہ وہ پارلیمنٹ میں آکراپنا کردارادا کریں۔
