کراچی (شوبز ڈیسک): پاکستان شوبز انڈسٹری کی مشہور و معروف اداکارہ مشال خان نے کہا ہے کہ میں نے موت کو بہت قریب سے دیکھا ہے۔حال ہی میں اپنے دیے گئے ایک انٹرویو میں اداکارہ مشال خان نے انکشاف کیا کہ میں نے موت کو بہت قریب سے دیکھا، میں بے خوابی کا شکار تھی۔
انہوں نے کہا کہ جب آپ کا وزن کم ہوتا ہے تو آپ کو جسم کی خرابی کا سامنا کرنا پڑتا ہے، میں بہت بیمار ہوگئی تھی، میں نے آٹھ ماہ کھانا پینا چھوڑ دیا تھا۔
ان کا کہنا تھا کہ میں صرف اپنی طاقت کے بل بوتے پر زندہ تھی، ایک دفعہ میں بے ہوش ہو گئی اور اس وقت میرا بلڈ پریشر 30/50 تھا اور میں کوما میں جا کر واپس آئی تھی۔
مشال خان نے بتایا کہ مجھے نہیں معلوم کیسے لیکن ہاں، جب آپ کو کھانے کا عارضہ ہوتا ہے تو آپ کھانے سے ڈرتے ہیں کیونکہ آپ کو وزن بڑھنے کا خوف ہوتا ہے۔
پاکستان شوبز انڈسٹری کی مشہور و معروف اداکارہ مشال خان کا مزید کہنا تھا کہ میں صرف پانی پی رہی تھی، لیکن ظاہر ہے کہ یہ خطرناک ہے اور لوگ اس مشق سے مر بھی جاتے ہیں لہٰذا ایسا نہ کریں۔
