کراچی (ویب ڈیسک): معروف قانون دان لطیف آفریدی قاتلانہ حملے میں جاں بحق ہوگئے۔ میڈیا کی رپورٹ کے مطابق لطیف آفریدی پر فائرنگ کا واقعہ پشاور ہائیکورٹ کے بار میں پیش آیا جہاں بار کے احاطے میں ان پر فائرنگ کی گئی جس میں سینئر وکیل لطیف آفریدی شدید زخمی ہوئے جنہیں تشویشناک حالت میں اسپتال منتقل کیا گیا تھا جہاں وہ جانبر نہ ہوسکے۔
لیڈی ریڈنگ اسپتال انتظامیہ نے 79 سالہ لطیف آفریدی کے جاں بحق ہونے کی تصدیق کردی ہے۔
پولیس کے مطابق عبدالطیف آفریدی کو 6 گولیاں لگیں اور ان پر فائرنگ کرنے والے شخص کو موقع پر ہی گرفتار کرلیا گیا ہے جس کی شناخت عدنان کے نام سے ہوئی ہے جب کہ ملزم سائل کے طور پر آیا تھا۔
سینئر وکیل اور معروف قانون دان عبدالطیف آفریدی ایڈووکیٹ کے قتل کے معاملے پر پاکستان بار کونسل اور سپریم کورٹ بار ایسوسی ایشن نے ملک بھر میں عدالتی کارروائی کے بائیکاٹ کا اعلان کیا ہے۔
پاکستان بار کونسل نے سابق صدر سپریم کورٹ بار لطیف آفریدی کے قتل کی مذمت کرتے ہوئے کہا کہ کے پی حکومت کی عدالتوں اور وکلا کوسکیورٹی فراہم کرنے میں ناکامی پر تشویش ہے، عدالتوں کے گرد سکیورٹی کے قیام کا مطالبہ کرتے ہیں۔
پاکستان بار کونسل نے کل ملک بھر کی عدالتوں میں ہڑتال کا اعلان کرتے ہوئے کہا کہ وکلا کل ملک بھر کی عدالتوں میں پیش نہیں ہوں گے۔
پاکستان بار کونسل کی جانب سے جاری اعلامیے میں کہا گیا ہے کہ لطیف آفریدی قانونی برادری کا قیمتی اثاثہ تھے، عبداللطیف آفریدی سپریم کورٹ بار کے صدر اور پاکستان بارکے وائس چیئرمین جیسے اہم عہدوں پر رہے، لطیف آفریدی قانون و آئین کی بالادستی، جمہوریت اور عدلیہ کی آزادی کے لیے لڑتے رہے۔
سپریم کورٹ بار ایسوسی ایشن کے سابقہ صدر عبداللیف آفریدی نے قتل ہونے سے قبل اپنی تقریر میں حکومت پر زور دیا کہ وہ طالبان کے خلاف کارروائی کرے. ایسی تقریر کرتے ہوئے اُن کی ویڈیو سوشل میڈیاپر شیئربھی ہوئی ہے .
In his last speech moments before being shot dead today, former Supreme Court Bar Association president #LatifAfridi had called on the government to act against #Taliban and condemned those who support them pic.twitter.com/q3WcbuZADk
— Dissent Today (@DissentToday) January 16, 2023
سپریم کورٹ بار ایسوسی ایشن نے بھی عبدالطیف آفریدی کے قتل کی مذمت کرتے ہوئے کل عدالتوں سے بائیکاٹ کا اعلان کیا اور کہا کہ وکلا کے قتل پر مذمتی بیانات کے بجائے ٹھوس اقدامات کیے جائیں۔
سپریم کورٹ بار ایسوسی ایشن کا کہنا ہے کہ لطیف آفریدی کے قتل میں ملوث افراد کو قرار واقعی سزا دی جائے، پارلیمنٹ وکلا کے تحفظ کے لیے قانون سازی کرے، وکلا کے تحفظ کے لیے صوبائی حکومتوں سے بھی رابطہ کریں گے۔
