کراچی (ویب ڈیسک): وزیراعلیٰ سندھ مرادعلی شاہ نے مردم شماری کے نتائج قبول نہ کرنےکا اعلان کردیا۔کراچی میں پریس کانفرنس کرتے ہوئے وزیراعلیٰ سندھ کا کہنا تھا کہ مردم شماری پر تحفظات تھے اور ہیں، ہمارے ساتھ زیادتی ہو رہی ہے ہر ضلع میں ہماری آبادی کو کم بتایا جا رہا ہے۔وزیراعلیٰ سندھ کا کہنا تھا کہ کراچی کی آبادی کو بھی 13لاکھ کم گنا گیا، احسان نہیں برابری چاہیے، ہمارے تمام لوگوں کو شمار کیا جائے، بلاکس کو مکمل گنا نہیں گیا۔
وزیر اعلیٰ سندھ سید مراد علی شاہ نے کہا ہے کہ جب تک ہمیں مردم شماری میں درست نہیں گنا جاتا ہم نتائج کو تسلیم نہیں کریں گے۔کراچی میں پریس کانفرنس کرتے ہوئے سید مراد علی شاہ نے کہا کہ میں ہمیشہ کہتا رہا ہوں کہ مردم شماری درست نہیں ہو رہی، چاہے اسے ڈجیٹل کہیں یا آٹومیٹڈ، میرے لیے وہ مردم شماری ٹھیک ہے جس میں ہر شخص کو گنا جائے اور مجھے تحفظات ہیں کہ گنتی صحیح نہیں کی گئی۔
انہوں نے کہا کہ کل مردم شماری کے حوالے سے ایک اجلاس ہوا جس میں مجھے مدعو نہیں کیا گیا لیکن مجھے بتایا گیا کہ پنجاب کے سوا باقی صوبوں میں مردم شماری روک دی گئی ہے۔
مراد علی شاہ کا کہنا تھا کہ پانچ دن بڑھانے سے خوش نہیں ہوں گا، ہمیں 2017 میں بھی غلط گنا گیا، مشترکہ مفادات کونسل میں معاملےکو لےکرگیا تھا، ہم اس مردم شماری کو قبول نہیں کریں گے، جب بھی لوگ آئے وہ ہمارے سوالوں کے جواب نہیں دے سکے۔
9 مئی کے واقعات کے حوالے سے وزیراعلیٰ سندھ کا کہنا تھا کہ 9 مئی کو وارنٹ کے ذریعے ملزم کی گرفتاری پر ملک بھر میں افراتفری پھیلائی گئی، جو ملوث ہیں کسی کو نہیں چھوڑیں گے سب کو سزا ہوگی.
