کراچی (ویب ڈیسک): حج برائے 2024 کے عازمین کی سہولت کیلئے کراچی سے ’روڈ ٹو مکہ‘ کے سروے کیلئے 12 رکنی سعودی وفد کراچی پہنچ گیا۔جناح انٹرنیشنل ائیرپورٹ پر ‘روڈ ٹو مکہ’ پراجیکٹ شروع کرنے کیلئے سعودی عرب کے 12 رکنی اعلیٰ سطح کے وفد نے کراچی ائیرپورٹ پر لینڈ کیا۔سعودی وفد کو کراچی ائیرپورٹ پر وفاقی سیکرٹری مذہبی امور اور ڈائریکٹر حج کراچی نے ویلکم کیا، ‘روڈ ٹو مکہ’ پراجیکٹ کے تحت کراچی ائیرپورٹ کو شامل کرنے کے لیے سعودی حکام جائزہ لیں گے اور حج کے دوران پاکستانی حجاج کی کراچی ائیرپورٹ پر امیگریشن کی سہولت کا جائزہ لیا جائے گا۔
اس منصوبے کے تحت کراچی کے حجاج کرام بھی اسلام آباد کی طرح ڈومیسٹک مسافر کے طور پر جدہ پہنچیں گے، سعودی حکام ‘روڈ ٹو مکہ’ پراجیکٹ کے تحت حجاج کی امیگریشن کے لیے سروے کریں گے۔
سعودی حکام کی رپورٹ پر رواں سال کراچی ائیرپورٹ کو ‘روڈ ٹو مکہ’ پراجیکٹ میں شامل کیا جائے گا، روڈ ٹو مکہ پراجیکٹ کے تحت حج کے دوران کراچی ائیرپورٹ پر حجاج کی امیگریشن جدہ ائیرپورٹ پر نہیں ہوگی، اس وقت صرف اسلام آباد ائیرپورٹ ‘روڈ ٹو مکہ’ پراجیکٹ میں شامل ہے جب کہ کراچی اور لاہور ائیرپورٹس کو ‘روڈ ٹو مکہ’ پراجیکٹ میں شامل کرنے کا منصوبہ ہے۔
سعودی حکام آج وزارت مذہبی امور ، امیگریشن، سول ایوی ایشن سے ملاقاتیں کریں گے اور اے ایس ایف اور کسٹم سمیت دیگر محکموں کے حکام کے ساتھ کراچی ائیرپورٹ کا جوائنٹ سروے کریں گے۔
سعودی حکام کی رپورٹ پر کراچی ائیرپورٹ کو اس سال حج کے دوران ‘روڈ ٹو مکہ’ پراجیکٹ میں شامل کیا جائے گا۔
