کراچی (ویب ڈیسک): فشری میں غیر ملکی کمپنی کے ملازمین سے ڈیڑھ کروڑ روپے سے زائد رقم لوٹ لی گئی۔پولیس کے مطابق کورین کمپنی فشری میں اپنی فیکٹری بند کر رہی ہے اور کمپنی کے ملازمین کو بونس سمیت دیگر واجبات کی ادائیگی کے لیے رقم نکلوائی گئی تھی۔ کیشیئر نے فشری میں ہی واقع نجی بینک سے ایک کروڑ 44 لاکھ روپے نکلوائے تھے جب کہ ایک دوسرے بیگ میں 7 لاکھ 60 ہزار روپے پہلے سے موجود تھے۔
پولیس کے مطابق چند قدم کے فاصلے پر واقع بینک سے گاڑی جونہی کمپنی کے باہر پہنچی تو 3 موٹر سائیکلوں پر سوار 5 مسلح ملزمان نے انہیں گھیر لیا، ملزمان نے سکیورٹی گارڈ سے اسلحہ چھین لیا اور پھر رقم کے دونوں تھیلے لوٹ کر فرار ہو گئے۔
پولیس کے مطابق واردات کی چھان بین شروع کردی گئی ہے اور سی سی ٹی وی بھی حاصل کی جا رہی ہے۔
پولیس کا شبہ ہےکہ اس واردات میں فیکٹری کا ہی کوئی ملازم ملوث ہے تاہم حتمی طور پر تفتیش کے بعد ہی کہا کچھ کہا جائے گا۔
