حیدرآباد (ویب ڈیسک): خیبر پختونخوا اور گلگت میں بارشوں کے باعث 300 سے زائد افراد کے جاں بحق ہونے پر دکھ، افسوس اور غم و غصے کا اظہار کرتے ہوئے عوامی تحریک کے مرکزی صدر ایڈووکیٹ وسند تھری، مرکزی جنرل سیکریٹری ایڈووکیٹ ساجد حسین مہیسَر، مرکزی نائب صدر ستار رند، مرکزی رہنما ایڈووکیٹ اسماعیل خاصخیلی، میر بشیر ٹالپور اور نور نبی پلیجو نے اپنے مشترکہ پریس بیان میں کہا ہے کہ بارشوں کے باعث بڑی تعداد میں جانی نقصان کی ذمہ دار حکومت ہے۔ حکومت عوام کو بروقت ریسکیو کرنے اور درست معلومات فراہم کرنے میں ناکام رہی۔ حکومتی نااہلی اور کرپشن کے باعث عوام کو بھاری جانی و مالی نقصان اٹھانا پڑا ہے۔
رہنماؤں نے مزید کہا کہ این ڈی ایم اے آفات کے نام پر کھربوں روپے کے فنڈز ہڑپ کر جاتی ہے لیکن بارش متاثرین کو ریسکیو کرنے کے لیے کچھ بھی نہیں کیا گیا۔ این ڈی ایم اے نے متاثرین کی مدد کرنے کے بجائے صرف جاں بحق ہونے والوں کی تعداد گننے تک ہی اپنے کام کو محدود کر رکھا ہے۔
رہنماؤں نے مزید کہا کہ سندھ میں بھی شدید بارشوں کی پیشگوئیاں کی گئی ہیں لیکن سندھ حکومت، پی ڈی ایم اے اور این ڈی ایم اے نے اس کے لیے کوئی پیشگی تیاری نہیں کی۔ اگر سندھ حکومت اور وفاقی حکومت آفات سے پیسہ کمانے کے بجائے عوام کی جان بچانے کو اہمیت دیتی تو عوام کو اتنے بڑے جانی و مالی نقصان کا سامنا نہ کرنا پڑتا۔
