(ویب ڈیسک):پاکستان کی سابقہ اداکارہ نور بخاری نے محرم الحرام کا احترام نہ کرنے والوں پر ناراضی کا اظہار کیا ہے۔موسمِ گرما کے اختتام پر بہت سے پاکستانی ہر سال کی طرح اس سال بھی چھٹیاں گزارنے کے لیے ملک کے شمالی علاقہ جات کا رخ کرتے یا پھر بیرونِ ملک جانے کے منصوبے بناتے ہیں اور سوشل میڈیا پر تصاویر اور ویڈیوز پوسٹ کرتے ہیں۔
نور بخاری کو محرم میں بھی لوگوں کے چھٹیاں منانے جانے کی روایت کو برقرار رکھنا بالکل پسند نہیں آیا جس کا اظہار انہوں نے اپنے انسٹاگرام اکاؤنٹ کی اسٹوری پر کیا۔
سابقہ اداکارہ نے اپنی انسٹا اسٹوری پر لکھا ہے کہ واہ رے امتی، آلِ رسول ﷺ پر پانی بند کر دیا گیا اور امتی چھٹیاں منانے جا رہے ہیں۔
نور بخاری نے یہ بھی لکھا ہے کہ 9 اور 10 محرم کا احترام تو دوسرے مذاہب کے لوگ بھی کرتے ہیں لیکن ہم یہاں چھٹیاں منانے کے منصوبے بنانے میں مصروف ہیں۔
خیال رہے کہ نور بخاری نے 2017 میں شوبز انڈسٹری کو خیر باد کہہ دیا تھا اور اب اسلام کی تعلیمات پر عمل پیرا ہیں۔
