کراچی (ویبڈیسک): حکومت سندھ نے منشیات کے خلاف کمر کس لی، سندھ بھر میں کریک ڈائون کی تیاریاں مکمل. سندھ کے سینئر منسٹر اور صوبائی وزیر برائے ایکسائز، ٹیکسیشن اینڈ نارکوٹکس کنٹرول، ٹرانسپورٹ وماس ٹرانزٹ شرجیل انعام میمن کی زیر صدارت اعلی سطحی اجلاس کریک ڈائون کے لئے اچھے افسران پر مشتمل ٹیمیں بنائی جائیں گی.
اس موقع پر شرجیل انعام میمن کا کہنا تھا کہ منشیات کے خلاف اب بڑے پیمانے پر موثر کریک ڈائون ہوگا،نوجوان نسل کو منشیات فروشوں کے چنگل سے نکالنا ہے.
انہوں نے مزید کہا کہ اچھی کارکردگی والے افسران کو انعامات و اعزازات سے نوازا جائے گا. روزانہ کی بنیاد پر کارروائیاں ہونگی، منشیات کا جڑ سے خاتمہ یقینی بنانا ہے.
شرجیل انعام میمن نے تفصیل بتاتے ہوئے کہا کہ منشیات فروشوں کے خلاف کریک ڈائون کے ساتھ نوجوان نسل کی آگہی کے لئے بھی کام کریں گے.
اجلاس میں سیکریٹری ایکسائز عاطف الرحمان، ڈی جی ایکسائز اورنگزیب پنہور، ڈی جی ایکسائز ایڈمن ریاض کھوسو اور دیگر نے شرکت کی.
