سیہون (ویب ڈیسک): حضرت لعل شہباز قلندر کے 771 ویں سالانہ عرس مبارک کا آغاز آج سے ہوگیا ہے۔تفصیلات کے مطابق گورنر سندھ کامران ٹیسوری نے سیہون میں حضرت لعل شہباز قلندر کے 771 ویں عرس کا افتتاح کیا۔اس موقع پر کامران ٹیسوری نے مزار پر چادر چڑھائی اور ملک کی خوشحالی اور استحکام کے لئے دعا بھی کی۔بعدازاں گورنر سندھ کامران ٹیسوری نے میڈیا سے گفتگو کرتے ہوئے کہا کہ ملک کی معاشی صورتحال کی بہتری کے لیئے دعا کرتے ہیں۔انہوں نے کہا کہ سندھ صوفیوں کی دھرتی ہے، اللہ ان کی کرامات سے صوبہ اور ملک کو ترقی دے۔
انہوں نے مزید کہا کہ آج میں نے یہا ں چادر چڑھائی اور پاکستان کے معاشی اور معاشرتی استحکام کیلئے دعائیں مانگی اور جہاں استحکام کی دعا کی وہاں یہ بھی دعا کی کہ اللہ عمران خان کو عقل عطا کرے۔
گورنر سندھ کا کہنا تھا کہ ایک شخص اپنی وزارت کھو جانے کی وجہ سے دماغی توازن کھو بیٹھا ہے،اپنے جھوٹ سے عوام کو لارے لپے دے رہا ہے جو کہہ رہا تھا ایک کروڑ نوکریاں دوں گا، جھوٹے وعدے کرنے والا جھوٹے خواب دکھا رہا ہے۔
ان کا کہنا تھا کہ جو شخص بھی اس کے خلاف آواز اٹھاتا ہے سوشل میڈیا اس کے پیچھے پڑ جاتا ہے۔
انہوں نے مزید کہا کہ کوئی بھی ملک جب پیسے دینا چاہتا ہے تو وہ اس ملک میں استحکام چاہتا ہے، یہ کہتا تھا کہ ہر کسی کو برابری کی بنیاد پر انصاف ملے لیکن خود کورٹس میں پیش نہیں ہورہا
انہوں نے کہا کہ مردم شماری پر تمام ہی جماعتوں کو کچھ نہ کچھ تحفظات ہیں اور جو حالات چھوڑ کر گئے تھے اس کے بعد اسحاق ڈار اور حکومت کوشش کر رہی ہے۔
کامران ٹیسوری نے کہا کہ اس ملک میں آئین اور قانون کی حکمرانی ہونی چاہئیے اور پاکستان اس وقت جس حالات سے گذر رہا ہے سب سے پہلے پاکستان کو دیکھنا ہے۔
