خیرپور (ویب ڈیسک): خیرپور کی تحصیل رانی پور میں پیر کی حویلی میں کام کرنے والی لڑکی کی ہلاکت کیس میں تفتیشی افسر کو تبدیل کردیا گیا۔عدالتی حکم پر ڈی ایس پی صفی اللہ سولنگی کو کیس کا نیا تفتیشی افسر تعینات کردیا گیا ہے۔
انسداد دہشتگردی کی عدالت نے گزشتہ سماعت پر تفتیشی افسر انسپیکٹر بچل قاضی پر عدم اطمینان کا اظہار کیا تھا ۔
گزشتہ سماعت پر مقتولہ لڑکی کے وکیل نےعدالت کو بتایا تھا کہ وہ پولیس کی تفتیش سے مطمئن نہیں ہیں، ملزمان تفتیش میں پولیس کے ساتھ تعاون نہیں کر رہے، پولیس ابھی تک موبائل فون کا پن کوڈ بھی حاصل نہیں کرسکی ہے۔
مقتولہ فاطمہ کے وکیل نے عدالت سے استدعا کی تھی کہ کیس کی مشترکہ تحقیقات کرائی جائے۔
خیال رہے کہ پیر کی حویلی میں کام کرنے والی ننھی فاطمہ کی ہلاکت کے کیس میں نامزد ملزمان سات روز کے جسمانی ریمانڈ پر ہیں۔
