اسلام آباد (ویب ڈیسک): پاکستان کے صوبے بلوچستان میں ایران کی جانب سے ہونے والے حملے میں دو بچیاں شہید ہوئیں اور تین زخمی ہیں، دفتر خارجہ نے اس واقعہ کی مذمت کی ہے، مزید تفصیلات جلد سامنے آئیں گی۔اس پر چین کی وزارت خارجہ کا بیان سامنے آیا ہے۔گزشتہ روز ایرانی فورسز نے بلوچستان کی جانب سے پاکستان کی فضائی حدود کی خلاف ورزی کرتے ہوئے بلوچستان میں میزائل اور ڈرون حملے کیے گئے تھے۔ایرانی سرکاری ٹی وی کی خبر میں دعویٰ کیا گیا تھا کہ ایرانی سکیورٹی فورسز کی جانب سے پاکستان کے صوبے بلوچستان میں جیش العدل نامی تنظیم کے دو ٹھکانوں پر میزائل اور ڈرون حملے کیے گئے۔
پاکستان نے ایرانی حملے کی شدید الفاظ میں مذمت کرتے ہوئے اسے پاکستانی فضائی حدود کی سنگین خلاف ورزی قرار دیا ہے اور تہران کو خبردار بھی کیا ہے کہ اس طرح کی خلاف ورزی مکمل طور پر ناقابل قبول ہے اور اس کے سنگین نتائج نکل سکتے ہیں، نتائج کی ذمہ داری پوری طرح سے ایران پر عائد ہو گی۔
ایرانی سکیورٹی فورسز کے ڈرون اور میزائل حملوں میں دو بچیاں شہید اور 3 زخمی ہوئی تھیں۔
اس معاملے پر چین کی وزارت خارجہ کی جانب سے جاری بیان میں ایران اور پاکستان سے تحمل سے کام لینے کی اپیل کی گئی ہے۔چینی وزارت خارجہ کا کہنا ہے کہ فریقین سے کشیدگی میں اضافے کا باعث بننے والے اقدامات سے گریز کا مطالبہ کرتے ہیں، امن و استحکام کو برقرار رکھنے کیلئے دونوں ملک مل کر کام کریں۔
کوئٹہ: نگران وزیر اطلاعات بلوچستان جان اچکزئی نے کہا ہےکہ ایران کی طرف سے پاکستانی خود مختاری کی خلاف ورزی تعلقات، اعتماد اور تجارتی روابط کو نقصان پہنچاتی ہے۔
کوئٹہ میں میڈیا سے گفتگو کرتے ہوئے جان اچکزئی نے کہا کہ پاکستان خصوصاً بلوچستان میں دشمن قوتیں بیرونی مداخلت کی کوشش کررہی ہیں لیکن دشمن کبھی اپنی سازشوں میں کامیاب نہیں ہوں گے، ہم ہر جگہ دشمن قوتوں کا بھر پور مقابلہ کرنے کی صلاحیت رکھتے ہیں۔
انہوں نے کہا کہ دفترخارجہ کہہ چکا ہےدہشتگردی خطےکے ممالک کے لیے مشترکہ خطرہ ہے، دہشتگردی کے خطرے سے نمٹنے کےلیے مربوط کارروائی کی ضرورت ہے، ہم سیاسی کارکن ہیں اورہر قسم کی دہشتگردی کےخلاف ہیں۔
ایرانی حملے پر صوبائی وزیر کا کہنا تھا کہ ایران کی طرف سے پاکستانی خود مختاری کی خلاف ورزی تعلقات،اعتماد اور تجارتی روابط کو نقصان پہنچاتی ہے، بلوچستان میں امن و امان کے قیام کے لیے حکومت اور سکیورٹی ادارے پوری طرح تیار ہیں۔
انہوں نے بتایا کہ ایران کےحملے میں دو بچیاں شہید ہوئیں اور تین زخمی ہیں، دفتر خارجہ نے اس واقعہ کی مذمت کی ہے، مزید تفصیلات جلد سامنے آئیں گی۔
جان اچکزئی کا کہنا تھا پاکستان کے مستعد ادارے دہشتگردوں سے نمٹنا جانتے ہیں، مزید علیحدگی پسند جلد قومی دھارے میں آنے والے ہیں۔
انہوں نے مزید کہا کہ افغانستان کے حوالے سے ہمارا مؤقف واضح ہے، ہم ان سے باہمی تعلقات پریقین رکھتےہیں، دہشتگردی کے بہت سے واقعات میں افغانستان کےلوگ ملوث رہےہیں۔
