انگلینڈ نے پاکستان کے تیسرے ٹیسٹ میچ کے دوسرے دن کھانے کے وقفے تک چار وکٹوں کے نقصان پر رنز بنا لیے ہیں۔
کراچی میں کھیلے جا رہے تین ٹیسٹ میچوں کی سیریز کے آخری میچ کے دوسرے دن انگلینڈ نے 7رنز ایک کھلاڑی آؤٹ سے اپنی پہلی نامکمل اننگز کا دوبارہ آغاز کیا تو بین ڈکٹ اور اولی پوپ وکٹ پر موجود تھے۔
دونوں نے پراعتماد انداز میں اننگز کا آغاز کیا اور بآسانی مزید 51 رنز جوڑ کر اسکور کو 58 تک پہنچا دیا تاہم اسی اسکور پر نعمان کی گیند پر 26 رنز بنانے والے ڈکٹ ایل بی ڈبلیو قرار دیے گئے۔
تاہم انگلینڈ کو بڑا دھچکا اس وقت لگا جب اگلی ہی گیند پر جو روٹ بھی سلپ میں کیچ دے بیٹھے اور انگلینڈ کی ٹیم یکے بعد دیگرے دو وکٹیں گنوا بیٹھی۔
دوسرے اینڈ سے اولی پوپ نے ذمے دارانہ بیٹنگ کرتے ہوئے اپنی نصف سنچری مکمل کی لیکن 98 کے مجموعی اسکور پر ابرار احمد کی خوبصورت گیند پر وہ اپنی وکٹیں محفوظ نہ رکھ سکے۔
اس کے بعد ہیری بروک کا ساتھ دینے کپتان بین اسٹوکس آئے اور دونوں نے مزید 42 رنز کی شراکت قائم کر کے کھانے کے وقفے تک مزید کوئی وکٹ نہ گرنے دی۔
جب میچ کے دوسرے دن کھانے کا وقفہ ہوا تو انگلینڈ نے چار وکٹوں کے نقصان پر 140 رنز بنائے تھے اور اسے قومی ٹیم کا پہلی اننگز کا اسکور برابر کرنے کے لیے مزید 164 رنز درکار ہیں۔
پاکستان کی جانب سے ابرار اور نعمان نے دو، دو وکٹیں حاصل کیں۔
یاد رہے کہ پاکستان کی ٹیم پہلی اننگز میں بابر اعظم اور آغا سلمان کی نصف سنچریوں کی بدولت 304 رنز بنا کر آؤٹ ہو گئی تھی۔
تین ٹیسٹ میچوں کی سیریز کے ابتدائی دو میچ جیتنے والی انگلینڈ کی ٹیم کو سیریز میں 0-2 کی فیصلہ کن برتری حاصل ہے۔
