کراچی (ویب ڈیسک): پاکستان کے 77 ویں یوم آزادی پر دنیا کے سب سے بڑے سرچ انجن گوگل نے پاکستان کے لیے اپنا نیا ڈوڈل پیش کردیا۔ ہر سال کی طرح اس سال بھی گوگل نے ایک منفرد اور نیا ڈوڈل پیش کیا جس میں دریائے سندھ کی’بلائنڈ ڈولفن‘ کو دکھایا گیا ہے، ڈوڈل کے نچلے حصے پر سبز رنگ کی پٹی میں گوگل لکھا ہے۔
گوگل نے ڈوڈل تبدیل کرنے کے ساتھ اپنے پاکستانی صارفین کو یوم آزادی کی مبارکباد دیتے ہوئے لکھا ہے کہ یوم آزادی مبارک ہو پاکستان، آج کے سالانہ ڈوڈل آرٹ ورک میں دانتوں والی ویل کی انواع کو دکھایا گیا ہے جو پاکستان کے دریائے سندھ کی مقامی ڈولفن ہے۔
‘یہ ڈولفن ختم ہو جانے کے خطرے سے دوچار نسل جسے اردو ‘بھولن’ اور سندھی میں ‘بلھن’ بھی کہا جاتا ہے، پاکستان کے ساحلوں پر خاص طور پر دیکھنے کو ملتی ہے‘۔
اس حوالے سے کچھ روز قبل عالمی آرٹسٹ اور بھٹو خاندان کے وارث ذوالفقار علی بھٹو جونیئر نے بھی اس حوالے سے تشویش کا اظہار کیا .
حال ہی میں کچھ نامعلوم و نامراد لوگوں کی جانب سے ‘بلھن’ کو گولیوں کا نشانہ بنانے پر بھی ذوالفقار علی بھٹو جونیئرنے اپنے سخت ردعمل کا اظہار بھی کیا اور دنیا کو اس نایاب نسل ڈولفن کی طرف متوجہ کیا . جس کی بدولت آج ‘بلھن’ کو پاکستان کی علامت کے طور پر ڈوڈل میںپیش کیا گیا
اگر ڈوڈل پر کلک کیا جائے تو جشنِ آزادی کی مناسبت سے آپ کی اسکرین پر آتش بازی ہوتی دکھائی دیتی ہے، اس کے علاوہ پاکستان کا جھنڈا بھی بنتا ہے۔اس ڈوڈل کو سوشل میڈیا کی مختلف ویب سائٹس پر بھی شیئر کیا جاسکتا ہے جس کے لیے دائیں جانب آپشنز موجود ہیں۔
خیال رہے کہ یہ گوگل کی روایت ہے کہ وہ دنیا کے مختلف ممالک کے اہم ثقافتی اور قومی دنوں کی مناسبت سے ڈوڈلز پیش کرتا ہے۔
